Fóðurprammi sökk í Reyðarfirði
Áhöfnin á varðskipinu Þór var kölluð út á níunda tímanum í gærkvöldi þegar mikill leki kom að stórum fóðurpramma sem þjónar fiskeldiskvíum í Reyðarfirði. Pramminn var sokkinn þegar varðskipið kom á staðinn.Á Facebook síðu Landhelgisgæslunnar segir að stjórnstöð Gæslunnar bárust upplýsingar frá starfsmönnum fiskeldisfyrirtækisins í firðinum um að pramminn væri að sökkva og þegar í stað var haft samband við áhöfnina á Þór sem var kölluð út til aðstoðar. Svo vildi einmitt til að varðskipið var statt í firðinum. Áhöfn á Þór gat af þeim sökum brugðist afar hratt við beiðninni.
Vonskuveður var á svæðinu og aðstæður afar krefjandi. Varðskipsmennirnir sjósettu léttbát Þórs og höfðu öflugar sjódælur meðferðis. Þegar áhöfnin á Þór kom á staðinn var ekkert hægt að gera. Pramminn var þá orðinn fullur af sjó og marar nú í kafi. Von er á þjónustuaðilum í fyrramálið til hefja undirbúning þess að koma prammanum aftur á flot.
Talið er að olía sé um borð og hefur Umhverfisstofnun, Samgöngustofu og fleiri viðeigandi aðilum verið gert viðvart. Varðskipið Þór verður jafnframt til taks á Reyðarfirði ef á þarf að halda.
