Gauti gefur ekki kost á sér í vor
"Nú þegar nýtt ár er gengið í garð og styttist í sveitarstjórnarkosningar tel ég tímabært að upplýsa að ég hyggst ekki gefa kost á mér til setu í sveitarstjórn nú í vor," segir Gauti Jóhannesson forseti sveitarstjórnar Múlaþings í færslu á Facebook síðu sinni.
"Á þeim 12 árum sem liðin eru frá því ég fór fyrst að vinna að sveitarstjórnarmálum hef ég verið talsmaður sameiningar sveitarfélaga og vann í aðdraganda þess að Múlaþing varð til ásamt góðum hópi fólks að því verkefni. Á þessu fyrsta kjörtímabili hefur Sjálfstæðisflokkurinn leitt sveitarstjórn Múlaþings í farsælu samstarfi þrátt fyrir erfiðar og að mörgu leyti fordæmalausar aðstæður. Nú þegar hyllir undir lok þess lít ég svo á að komið sé að ákveðnum kaflaskilum og þá sé rétt að stíga til hliðar og skapa þannig rými fyrir ný sjónarmið og áherslur," segir Gauti.
Hinn bendir síðan á að þetta sé hins vegar engin kveðjustund. Enn eru nokkrir mánuðir til kosninga og verkefnin næg. Sjálfstæðisflokkurinn í Múlaþingi hefur á að skipa fjölmörgum öflugum einstaklingum og í hans huga er enginn vafi að flokkurinn mun stilla upp sterkum lista í vor. Alltaf kemur maður í manns stað.
"Vil svo að lokum nota tækifærið og óska öllum gleðilegs nýs árs – og þótt fyrr hefði verið," segir Gauti.
