Hafbjörg dregur fiskiskip til hafnar
Fréttir • This email address is being protected from spambots. You need JavaScript enabled to view it. • Fyrst birt 09. sep 2024 16:14 • Uppfært 09. sep 2024 16:14
Hafbjörg, skip Björgunarsveitarinnar Gerpis í Neskaupstað, er á leið til hafnar eftir að hafa verið kallað út eftir hádegi í dag eftir að bilun kom upp í báti á leið til hafnar.
Útkallið barst rétt upp úr klukkan eitt í dag þegar fiskiskipið Vésteinn lenti í vandræðum úti fyrir Dalatanga, um 17 sjómílur norðaustur af Neskaupstað.
Skipið fór frá Neskaupstað í gær og var á leið heim af veiðum út undan Héraðsflóa þegar gír þess bilaði þannig það gat ekki lengur siglt fyrir eigin vélarafli.
Hafbjörgin kom að Vésteini skömmu upp úr klukkan þrjú. Stuttu síðar var komin taug á milli skipanna og stefna þau nú inn til Neskaupstaðar.
Samkvæmt tilkynningu Landsbjargar var engin hætta á ferðum. Fjórir voru um borð í Vésteini.
Mynd: Landsbjörg
