Hringvegurinn í sundur á þremur stöðum vegna vatnavaxta
Veginum frá Fáskrúðsfirði til Hafnar hefur verið lokað alveg vegna hvassviðris og vatnavaxta. Bíll lenti ofan í skurði sem myndaðist í veginn í Berufirði.Vegurinn við Karlsstaðavita norðanverðum Berufirði grófst í sundur í vatnavöxtum seinni partinn. Í veginn myndaðist skurður sem bifreið keyrði ofan í.
Samkvæmt upplýsingum frá lögreglu voru tveir í bílnum. Þeir meiddust en ekki er ljóst hve alvarlega. Aðgerðir standa yfir.
Vegurinn frá Breiðdalsvík til Hafnar hefur verið skráður opinn lengst af í dag, en er nú lokaður. Vegurinn er einnig í sundur við Tóftá í sunnanverðum Stöðvarfirði. Þá flæðir Jökulsá í Lóni yfir varnargarða og veginn þar. Til viðbótar hefur verið ófært milli Fáskrúðsfjarðar og Stöðvarfjarðar vegna hvassveðurs í dag.
Ausandi rigning hefur verið á svæðinu í dag. Samkvæmt Veðurstofunni er úrkoman á Teigarhorni orðin tæpir 110 mm frá miðnætti. Sú úrkoma féll nær öll frá klukkan átta í morgun til klukkan 16. Þá fór heldur að draga úr henni. Rennsli í Fossá í Berufirði þrefaldaðist á þessum tíma, úr 40 rúmmetrum á sekúndu í rúmmetra. Rennsli Geithellnaár í Álftafirði fór úr um 100 rúmmetrum í 266.
Vatn flýtur einnig yfir veginn í Hróarsdtungu. Klæðning fór af milli Kolmúla og Hafraness í Reyðarfirði í veðurofsanum í dag.
Verkefni viðbragðsaðila vegna foktjóns hafa haldið áfram fram eftir degi þótt ástandið hafi orðið stöðugra eftir hádegið. Helstu verkefnin eru á Stöðvarfirði og Breiðdalsvík.
