Óvenju hvasst á Egilsstöðum – Myndir

Egilsstaðir eru á opnu svæði og þar myndast því gjarnan síður miklir vindstrengir heldur en inn til dala eða í fjörðum. Samkvæmt veðurmælingum frá Egilsstaðaflugvelli hefur þar að jafnaði verið 20 m/s vindur síðan um klukkan níu í morgun með reglulegum hviðum upp á 35 m/s.

Stærsta tjónið er trúlega tré sem brotnaði í garði við götuna Selás og féll þar á hús. Eins losnuðu þakplötur á húsi í Skógarseli. Við Kleinuna brotnaði fánastöng. Rúða brotnaði í strætóskýli við íþróttahúsið og skilti við tjaldsvæðið.

Sterkur vindstrengur liggur í gegnum iðnaðarhverfið á Egilsstöðum. Þar hafa hlutir færst úr stað en ekki er að sjá teljandi tjón. Vindstrengurinn skellur af afli á lögreglustöðinni þar sem merkingar eru farnar að flagna af.

Þar þurfti að tryggja grindverk í morgun. Varnargirðing í kringum byggingarsvæði Sigurgarðs hefur verið tryggð, en hún hafði áður farið af stað í veðrinu sem gekk yfir Austurland á mánudag. Á þó nokkrum stöðum má sjá rusl sem hefur fokið.

Upp úr hádegi hægði á útköllum björgunarsveita á Austurlandi. Um hálf fjögur var björgunarsveitin Eining kölluð út vegna þakplatna sem voru að fjúka við Ormsstaði.