Höskuldur tapaði fyrsta slagnum: Kosið með tvöföldu kjördæmisþingi
Fréttir • This email address is being protected from spambots. You need JavaScript enabled to view it. • Fyrst birt 29. okt 2012 19:08 • Uppfært 08. jan 2016 19:23
Sigmundur Davíð Gunnlaugsson virðist standa betur að vígi í baráttu sinni við Höskuld Þórhallsson eftir kjördæmisþing Framsóknarmanna í Norðausturkjördæmi. Þar var ákveðið að velja á listann með að halda tvöfalt kjördæmisþing.
Kosið var á milli tvöfalds kjördæmisþing, sem flokksmenn hafa yfirleitt notast við á svæðinu og lokaðs prófkjörs, sem Höskuldur og hans stuðningsmenn töluðu fyrir. Munurinn var töluverður, 115 studdu kjördæmisþingið en 48 prófkjörið.
Tvöfalda kjördæmisþingið verður haldið í Mývatnssveit 1. desember. Á því eiga sæti bæði aðal- og varafulltrúar frá Framsóknarfélögunum í kjördæminu en aðeins aðalfulltrúar sátu þingið um helgina.
Höskuldur og Sigmundur Davíð há nú harða baráttu um oddvitasæti listans. Stuðningsmenn Höskuldar stóðu þannig fyrir skoðanakönnun á Akureyri í síðustu viku sem sýndi vinsældir hans þar. Niðurstaða kjördæmisþingsins ætti hins vegar að vera sigur fyrir Sigmund og sýnir ef til vill að vinsældir Höskuldar eru takmarkaðar utan Akureyrar.
