Kveikt í rusli án leyfis
Slökkvilið frá Egilsstöðum var í gærkvöldi kallað út vegna elds sem logaði í landi Blöndugerði í Hróarstungu. Ekki var vitað í hverju logaði þegar slökkviliðið var kallað út.Slökkviliðið var kallað út rétt fyrir klukkan hálf níu í gærkvöldi eftir að ábending barst frá vegfaranda um Heiðarenda sem séð hafði eld. Ekki var ljóst þá í hverju logaði og fóru átta slökkviliðsmenn af stað frá Egilsstöðum á þremur bílum.
Þegar komið var á staðinn var ljóst að kveikt hafði verið í rusli, timbri og öðrum úrgangi. Ingvar Birkir Einarsson, varaslökkviliðsstjóri, segir að eldurinn hafi ekki verið mikill og engar byggingar eða annað í umhverfinu verið í hættu.
Slökkt var í eldinum og var slökkviliðið komið aftur til baka í Egilsstaði um klukkan tíu í gærkvöldi. Þeir sem kveiktu í ruslinu mega hins vegar eiga von á sekt. Opin brennsla úrgangs er bönnuð samkvæmt lögum og gefnar eru út sektir ef kallað er út slökkvilið vegna slíkra brota.
Mynd úr safni.
