Leita styrkja til að bjóða áfram gjaldfrjálsar tíðavörur í skólum
Hjá Múlaþingi leita menn nú styrkja frá fyrirtækjum til að halda áfram því starfi að veita ungmennum í sveitarfélaginu aðgang að gjaldfrjálsum tíðavörum.
Verkefni þessu var fyrst hleypt af stokkunum 2021 að tilstuðlan þáverandi ungmennaráðs Múlaþings. Það gekk út á að ungmenni hefðu gjaldfrjálsan og ekki síst auðveldan aðgang að tíðavörum í grunnskólum og félagsmiðstöðvum í sveitarfélaginu. Slíkt hefur meðal annars tíðkast um tíma í mörgum skólum á Norðurlöndunum og stöku sveitarfélög hérlendis hafa tekið þetta upp sem reglu.
Framtakið fékk afar góðar viðtökur á sínum tíma og nú vill sitjandi ungmennaráð endurtaka leikinn sé þess kostur en til þess þarf styrkveitingar frá utanaðkomandi aðilum á borð við Alcoa-Fjarðaál sem studdi verkefnið upphaflega gegnum styrktarsjóð sinn.