Mjög dregur úr álagi og þreytu nemenda í grunnskólum Austurlands
Álag á nemendur í þremur bekkjum grunnskóla á Austurlandi minnkar töluvert á milli ára samkvæmt Íslensku æskulýðsrannsókninni 2024 sem gerð var opinber í vikunni. Þá finna mun færri nemendur fyrir þreytu á skólatíma.
Rannsókn þessari er ætlað að varpa ljósi á líðan barna í grunnskólum landsins og með því fá skýrar vísbendingar hvernig bæta megi þá líðan almennt.
Við kynningu á niðurstöðum þessa árs fannst nokkuð skýr munur á nokkrum lykilþáttum meðal nemendanna frá fyrri könnun 2023. Könnunin er skrifleg meðal allra nemenda í 6., 8. og 10. bekkjum og er ávallt gerð á vorin. Að henni stendur Menntavísindadeild Háskóla Íslands.
Færri þreyttir
Jákvæð þróun er einnig vera raunin varðandi grunnskóla Austurlands og þar sérstaklega í tveimur þáttum. Annars vegar fækkar mikið þeim nemendum sem segjast vera þreytt í skólanum nánast alla daga eða flesta. Skýrt dæmi um það er 10. bekkur en yfir helmingur þeirra, 50,8%, kvartaði yfir mikilli þreytu á skólatíma 2023 en einungis 31,7% kvarta yfir því sama nú. Einnig dregur markvert úr þreytu hjá nemendum í 8. bekk eða úr 49,1% í 39,1%
Færri undir álagi
Þeim fækkar einnig töluvert sem kvarta yfir miklu eða nokkuð miklu álagi í náminu austanlands. 2023 sagðist 31,5% nemenda 6. bekkjar finna fyrir töluverðu álagi en ári síðar er fjöldi þeirra kominn niður í 25,4%. Í 8. bekk sögðust 54,4% þeirra vera undir töluverðu álagi 2023 en fjöldinn í nýju könnuninni er 40,4%. Álagið minnkar einnig meðal elstu nemendanna í 10. bekk. Hvorki fleiri né færri en 71,2% þeirra sögðust undir miklu eða töluverðu námsálagi í fyrra en hlutfallið nú mælist 61,3%.
