September á Austurlandi með þeim köldustu um árabil
Eftir afar rysjótta sumartíð víðast hvar á Austurlandi voru margir að vona að haustbyrjunin yrði mild og góð á móti. Sú von gekk ekki eftir því bæði var hvassara og mun kaldara í fjórðungnum en verið hefur um árabil.
Þetta staðfesta tíðarfarstölur Veðurstofu Íslands fyrir nýliðinn septembermánuð og það annar mánuðurinn í röð sem hitastig austanlands er töluvert undir meðaltali síðustu rúmlega 30 ára.
Meðalhiti mánaðarins á Egilsstöðum reyndist aðeins vera 6,1 stig sem er 2,3 stigum lægra en meðalhiti sama mánaðar síðustu tíu árin. Að Teigarhorni var 2,0 stigum kaldara í september en síðasta áratuginn og á Dalatanga 1,6 stigum undir því sem verið hefur yfir sama tímabil.
Annað athyglisvert við septembermánuð er hve hár loftþrýstingur mældist um land allt en ekki hvað síst á Austurlandi þar sem meðal annars mældist allra hæsti loftþrýstingur sem mælst hefur á Dalatanga frá upphafi mælinga þar árið 1938. Þetta algjörlega á skjön við loftþrýstingstölur ágústmánaðar sem voru óvenjulega lágar og þann mánuð allan mældist hann allra lægstur á Vattarnesi.
Aldrei hefur mælst jafn hár loftþrýstingur á Dalatanga yst í Mjóafirði og reyndin varð í síðasta mánuði
