Sex verkefni á Eyrarrósarlistanum
Sex verkefni eru á Eyrarrósarlistanum, þar af þrjú sem eru formlega tilnefnd til verðlaunanna sjálfra, sem afhent verða á Seyðisfirði eftir rúma viku. Eyrarósin er veitt fyrir framúrskarandi menningarverkefni utan höfuðborgarsvæðisins.Ekkert austfirskt verkefni er á listanum í ár en Austfirðingar hafa verið sigursælir í gegnum tíðina. Þannig hafa þrjú verkefni frá Seyðisfirði hlotið viðurkenninguna, síðast List í ljósi í fyrra, sem er ástæðan fyrir að verðlaunin verða afhent þar föstudaginn 14. febrúar.
Sex verkefni eru á hinum svokallaða Eyrarrósarlista, þar af eiga þrjú þeirra möguleika á að hljóta viðurkenninguna sjálfa.
Á listanum eru:
Júlíana - hátíð sögu og bóka í Stykkishólmi. Hátíðin hefur verið haldin árlega frá árinu 2013 að frumkvæði fjögurra kvenna sem vildu lífga upp á menningarlífið á veturna í bænum. Leiðarljós hátíðarinnar er að stuðla að umfjöllun um þýðingu sögunnar og sagnaarfsins í samtímanum.
Plan -B - listahátíð í Borgarnesi. Hátíðin er vettvangur fyrir listamenn til að þróa hugmyndir sínar og listsköpun í því formi sem þeir kjósa. Þeir miðlar sem listamenn hátíðarinnar vinna í eru því fjölbreyttir, allt frá málverki til gjörninga. Hún var fyrst haldin árið 2016.
Reykholtshátíð í Borgarfirði. Hátíðin hefur verið haldin síðustu helgina í júlí frá árinu 1996 og er því meðal rótgrónustu tónlistarhátíða landsins. Flytjendur hafa bæði verið úr fremstu röð íslensks tónlistarlífs auk erlendra gesta.
Verkefnin þrjú sem unnið geta verðlaunin eru:
Kakalaskáli í Skagafirði. Í Kakalaskála er sögu Sturlungaaldar miðlað í gegnum sögu- og listasýningu með hljóðleiðsögn. Sýningin var unnin síðasta vor af 14 listamönnum frá 10 þjóðlöndum. Þar er einnig útilistaverk, úr ríflega 1300 steinum, sem sviðsetur Hauganesbardaga.
Menningarstarf í Alþýðuhúsinu á Siglufirði. Á þeim 8 árum sem starfseminni hefur verið haldið úti hafa um þúsund listamenn og skapandi einstaklingar komið fram í Alþýðuhúsinu og um 300 viðburðir verið settir upp fyrir gesti og gangandi að njóta.
Skjaldborg – hátíð íslenskra heimildamynda, Patreksfirði. Hátíðin er sú eina hérlendis sem sérhæfir sig í að frumsýna íslenskar heimildamyndir. Á Patreksfirði koma saman bæði byrjendur, reynsluboltar og almennir áhorfendur í samtali sem skiptir miklu máli fyrir íslenska heimildamyndagerð.
Frú Eliza Reid, verndari Eyrarrósarinnar, mun afhenda verðlaunin.
