Sigurjón Þórðarson leiðir Flokk fólksins
Fréttir • This email address is being protected from spambots. You need JavaScript enabled to view it. • Fyrst birt 22. okt 2024 11:37 • Uppfært 22. okt 2024 11:38
Sigurjón Þórðarson, framkvæmdastjóri heilbrigðiseftirlits Norðurlands vestra og varaþingmaður Flokksins fólksins, mun skipa fyrsta sætið á lista flokksins í Norðausturkjördæmi fyrir komandi kosningar.
Frá þessu greinir Vikublaðið. Í gærkvöldi kom í ljós að þingmaðurinn Jakob Frímann Magnússon yrði ekki oddviti áfram í kjördæminu. Blaðið segir hann ekki hafa fengið náð fyrir augum uppstillingarnefndar.
Sigurjón er fæddur í Reykjavík árið 1964. Hann lauk BS prófi í líffræði frá Háskóla Íslands og síðar framhaldsnámi í fráveitu og vatnshreinsifræðum frá Englandi. Hann hefur verið framkvæmdastjóri heilbrigðiseftirlits Norðurlands vestra.
Hann gerði þó hlé á því starfi og varð þingmaður Frjálslynda flokksins í Norðvesturkjördæmi kjörtímabilið 2003-7. Sigurjón skipaði sjötta sætið á lista Flokks fólksins í Norðvesturkjördæmi í síðustu kosningum. Hann hefur þó fimm sinnum á yfirstandandi kjörtímabili tekið sæti sem varaþingmaður.
