Stefna á að hefja framleiðslu rafeldsneytis árið 2028
Fjarðabyggð og fjárfestingasjóðurinn CI ETF I, sem stýrt er af Copenhagen Infrastructure Partners (CIP), hafa undirritað nýja sameiginlega yfirlýsingu um næstu skref í uppbyggingu græns orkugarðs og framleiðslu græns rafeldsneytis í Fjarðabyggð. Gert er ráð fyrir að framleiðsla geti hafst árið 2028.Þetta kemur fram í fréttatilkynningu frá Fjarðabyggð.
Yfirlýsingin kveður meðal annars á um að Fjarðabyggð og CI ETF I gangi til samninga um staðarval, hafnarstarfsemi, aðgang að vatni og uppbyggingu á hitaveitu með heitu vatni sem verður til við rafeldsneytisframleiðslu.
Gert er ráð fyrir að orkugarðurinn byggist upp á norðurströnd Reyðarfjarðar sem er í eigu Fjarðabyggðar.
Fagnar skrefinu
Í tilkynningunni segir að ákvörðun CIP og Fjarðabyggðar byggir á vinnu sem unnin hefur verið undanfarið ár í samstarfi við Landsvirkjun við að meta kosti þess að þróa grænan orkugarð á Reyðarfirði. Í upphafi hafi verið kannaðir kostir þess að framleiða rafeldsneyti auk þess sem greind voru möguleg samlegðaráhrif við starfsemi á svæðinu. Vonir standa til að verkefnið styðji við orkuskipti Íslands í sjávarútvegi og landflutningum.
„Við fögnum þessu mikilvæga skrefi í áttina að áframhaldandi uppbyggingu á grænni orkuframleiðslu á Austurlandi. Á svæðinu er að finna öflugt atvinnulíf og við teljum þetta metnaðarfulla verkefni sé þýðingarmikið fyrir samfélagið okkar. Ísland stendur framar mörgum öðrum þjóðum í framleiðslu sjálfbærrar orku og getur skipt sköpum í baráttunni við loftslagsbreytingar eins og alþjóðasamningar kveða á um,“ er haft eftir Jóni Birni Hákonarsyni, bæjarstjóra.
Vilja byggja vetniseyju
Copenhagen Infrastructure Partners (CIP) er fjárfestingarsjóður með höfuðstöðvar í Danmörku og hefur einbeitt sér að ýmsum fjárfestingarverkefnum tengdum uppbyggingu grænnar orkuframleiðslu víða um heim. Á heimasíðu fyrirtækisins má til dæmis sjá kynningu á hugmyndum þess um byggingu vetniseyju í Norðursjó sem framleitt geti gríðarlega orku með vindi. Á COP26 ráðstefnunni birti CIP vegvísi með áætlun um hvernig sjóðurinn ætlar að auka hlut sinn í orkuskiptum með grænum fjárfestingum í orkugeiranum fyrir 2030, með fjárfestingum upp á 100 milljarða evra. CIP er með um 120 alþjóðlega fjárfesta, þar á meðal eru margir norrænir og alþjóðlegir lífeyrissjóðir.
Jón Björn Hákonarson, bæjarstjóri og Anna-Lena Jeppsson, verkefnastjóri hjá CIP, við undirskriftina á skrifstofum Fjarðabyggðar þann 14. júní síðastliðinn.
