Vinna hafin við að gegnumlýsa neysluvatn á Borgarfirði eystri í framtíðinni
Hafin er vinna af hálfu HEF-veitna að endurbæta vatnsveitu Borgarfjarðar eystri en þar hefur ítrekað orðið vart kólígerlamengunar undanfarin misseri. Óumflýjanlegt er að koma þar upp gegnumlýsingartæki.
Málið var reyfað á síðasta stjórnarfundi HEF-veitna en Borgfirðingar hafa orðið að sjóða allt sitt neysluvatn um tíma nokkrum sinnum undanfarið vegna mengunar sem gjarnan kemur fram í úrkomutíð.
Framkvæmdastjóri HEF-veitna, Aðalsteinn Þórhallsson, lýsti fyrir rúmu ári undrun manna á neysluvatnsmengun á staðnum enda var þá engum kunnugt um að slík mengun hefði áður komið upp í vatnsbóli Borgfirðinga. Á fundinum nú var það hins vegar viðurkennt að líkast til hefur mengun í neysluvatninu verið til staðar annars lagið um árabil án þess að vart hafi orðið.
Af þessum sökum er óumflýjanlegt að setja upp gegnumlýsingarbúnað sem drepur allar örverur sem komast í vatnið með útfjólubláu ljósi. Hafa starfsmenn HEF-veitna ásamt sérstökum ráðgjafa sett í gang greiningu á stækkunarþörf tækirýmis vatnsveitunnar vegna gegnumlýsingartækisins. Að auki þarf að endurhanna lagnir og annan búnað í umræddu rými.
Til að koma í veg fyrir ítrekaða mengun neysluvatns Borgfirðinga dugar ekki annað en nota ljósbúnað til að gegnumlýsa allt það vatn. Mynd Byggðastofnun/Kristján Þ. Halldórsson
