Ungur Reyðfirðingur á leið í norrænan rithöfundaskóla: Á ekki að grípa öll góð tækifæri er þau gefast?
Unnur Mjöll Jónsdóttir, nemandi í tíunda bekk Grunnskóla Reyðarfjarðar, er á leið í norrænan rithöfundaskóla sem haldinn verður í Svíþjóð í næstu viku. Hún segist hafa séð auglýsta keppni um sæti í skólanum og ákveðið að freista gæfunnar.„Mig langar að prófa eins mikið og ég get áður en ég fer að ákveða alveg hvað ég ætla að gera í framtíðinni þannig að ég bara skrifaði texta og sótti um. Á maður ekki að reyna að grípa öll góð tækifæri þegar þau gefast?“ segir Unnur Mjöll í samtali við Austurfrétt.
Hún er ein sjö íslenskra ungmenna sem í gær hélt til Svíþjóðar í norrænan rithöfundaskóla fyrir ungmenni sem haldinn verður í vikunni. Nemendur sendu inn sögur til að komast inn í skólann og þótti saga Unnar Mjallar ein sú besta.
Sagan heitir Flóttinn en hægt er að lesa hana hér á Austurfrétt. Hún fjallar um íraska stelpu sem á barnsaldri flýr heimaland sitt undan stríðsátökum. Hún til Íslands en lendir utanveltu og á glapstigu.
Námskeiðið er haldið í lýðháskólanum Biskops-Arnö skammt utan Stokkhólms. Það sækja um 30 ungmenni frá öllum Norðurlöndunum. Norræna félagið í Svíþjóð stendur að námskeiðinu með stuðningi Norrænu ráðherranefndarinnar.
