Fara í fjósið áður en þær fara í skólabílinn á morgnana
„Sameignin telur átta börn,“ segir Auðbjörg Elísa Stefánsdóttir, en hún býr ásamt manni sínum Steinþóri Björnsyni og fjölskyldu þeirra á Hvannabrekku í Berufirði þar sem þau reka myndarlegt kúabú. Að austan á N4 heimsótti líflegt heimilið fyrir jól.
Kúabúið á Hvannabrekku hefur gefið sér gott orð í mjólkurframleiðslu. „Við erum með 211 nautgripi í heildina, með kúm, nautum og kálfum. Af því eru þrjátíu mjólkandi kýr. Ef við höldum okkur í 1A-flokki allar vikur ársins þá flokkast það sem gæðamjólk og viðurkenning er veitt,“ segir Auðbjörg, eða Auja, en kúabúið á Hvannabrekku hefur fimm sinnum hlotið þá viðurkenningu. Mjólkin frá Hvannabrekku er unnin frá Egilsstöðum og fer að mestu leyti í osta.
Mörg handtök á stóru heimili
Auja segir það ganga alveg merkilega vel að sameina barnauppeldi og búskap. „Það er yfirleitt mjög rólegt á virkum dögum þegar krakkarnir eru í skólanum. Mesta vinnan er á Steinþóri sem fer í fjósið klukkan fimm á morgnana, en hann sinnir öllum útiverkum meðan yngsta barnið er svo lítið,“ segir Auja.
Elstu stúlkurnar sem hafa fasta búsetu á Hvannabrekku, Guðrún Lilja (14 ára) og Anna Jóna (11 ára), eru duglegar að hjálpa til og fara með Steinþóri í fjósið áður en þær taka skólabílinn á Djúpavog á morgnana.
„Það er svolítið erfitt stundum þegar maður er búinn að gera það oft í röð, en það er bara hressandi,“ segir Anna Jóna. „Þú verður að sætta þig við að þurfa að hjálpa,“ bætir Guðrún Lilja við.
