Helgin; Spunaleiklist eins og handboltaleikur
„Ég lofa ógeðslega fyndinni sýningu og það væri frábært að hafa fullt af fólki í salnum,“ Dóra Jóhannsdóttir, stofnandi Improv Ísland, en flokkur frá þeim verður með sýningu í í Tónlistarmiðstöð Austurlands á sunnudagskvöldið klukkan 20:00.
„Við vorum að klára okkar síðustu sýningu í vetur hér fyrir sunnan og það er virkilega skemmtilegt að enda leikárið með því að fara út á land. Þetta verða tvær hálftíma sýningar með hléi á milli.“
Dóra segir að hægt sé að líkja spunalistinni við handboltaleik. „Við vitum aldrei hvað er að fara að gerast og spinnum allt á staðnum. Við erum alltaf að reyna að bæta okkur, æfa tæknina og verða sterkari í sportinu. Þrátt fyrir að vita aldrei neitt þá krefst þessi tegund leikhúss mikillar tækni, við verðum að þora, hlusta vel til þess að geta tekið á móti öllum boltum. Þetta er svolítið eins og handboltaleikur – maður veit ekkert hvað á eftir að gerast í honum, eða hver skorar hvar. En, ef leikmennirnir myndu ekki kunna reglurnar eða vera í góðu formi, þá væri leikurinn alveg glataður. Þetta er eins með okkur, við verðum að vera í mjög góðu formi og vera gott lið til að eiga stórleik.“
Aðgangur 2000 krónur en frítt fyrir börn á grunnskólaaldri.
Listasamkoma í Herðabreið
Eftirmiðdags listasamkoma verður í Herðubreið á Seyðisfirði á morgun, föstudag. Listakonan Uta Pütz sýnir verk í vinnslu, undir yfirskriftinni When I Visit Homes. Verkin hafa verið í þróun síðustu tvo mánuði meðan Uta dvaldi sem gestalistamaður Skaftfells, í boði Goethe-Institut Dänemark.
Mary Hurrell mun einnig ljúka tveggja mánaða dvöl sinni með því að flytja Stereoskin, sem er sjón og hljóðverk, kl. 18:30 í bíósalnum og flutningur tekur 20 mínútur. Hér lesa nánar um viðburðina.
List án landamæra í fullum gangi
List án landamæra var sett á Egilsstöðum í gær en sýningar standa til 11. maí. Hér má sjá dagskrána í heild sinni.
