„Það er alltaf einhver heilagleiki yfir því að spila í kirkju“
„Það er alltaf gaman að koma austur og sjálfur hef ég aldrei spilað í Bláu kirkjunni þannig að ég er mjög spenntur,“ segir Jónas Sigurðsson í Ritvélum framtíðarinnar, en sveitin heldur tónleika á Seyðisfirði í kvöld.„Við erum í útilegutúr um landið með mökum og börnum þannig að þetta er mikið stuð. Sumarlífið á Seyðisfirði er alveg einstakt þannig að við erum mjög spennt. Við spiluðum í kirkjunni í Vík í Mýrdal í gær og það er alltaf einhver heilagleiki yfir því að spila í kirkju og við hlökkum mikið til í kvöld,“ segir Jónas.
Jónas segir að dagskrá kvöldsins verði góð blanda. „Við verðum með eitthvað nýtt efni sem enn er í vinnslu í bland við það gamla og góða. Einnig ætlum við að vekja upp gömul lög sem við erum ekki völ að spila – en það er alltaf kúnst að spila fyrir hóp þar sem einhverjir eru að koma í fyrsta skipti og aðrir hafa kannski komið margoft á tónleika. Ég vonast bara til þess að sjá sem flesta, þetta verður alveg yndislegt kvöld.“
Nánar er hægt að fylgjast með tónleikunum hér. Hægt er að kaupa miða á Miði.is eða við innganginn.
