Í Fiskhöllinni í Fellabæ er handagangur í öskjunni sem aldrei fyrr, því þar eru tíu manns vakin og sofin yfir kæstri tindabykkju og skötu. Framleiða á um sjö tonn fyrir Þorláksmessu, en því hefur verið slegið fram að Íslendingar leggi sér um þrjátíu tonn af kæstum fiski til munns þennan eina dag ársins.
Á fimmtudag verður efnt til ráðstefnunnar Æskan á óvissutímum. Að henni stendur Ungmenna- og íþróttasamband Austurlands, UÍA og er ætlunin að fjalla um íþrótta- og ungmennastarf á tímum þjóðfélagskreppu. Margt er góðra framsögumanna og rýnt verður í hvernig samfélagið getur stutt sem best við börn og unglinga. Að ráðstefnunni koma, auk UÍA, UMFÍ, Æskulýðsráð, Bandalag íslenskra skáta, KFUM og KFUK, menntamálaráðuneyti og Fljótsdalshérað. Allir eru velkomnir.
Meðal efnis: Vísbendingar um að olíu og gas sé að finna undan Borgarfirði eystra / Sveitarstjórnir vilja rannsókn á Gift / Vöktun á að ljúka / Miðsóknarkraftur Krísuvíkurborgar (leiðari) / Smári Geirsson og Þorvaldur Jóhannsson svara grein dr. Þórólfs Matthíassonar úr síðasta Austurglugga um áhrif stórframkvæmdanna á Austurlandi á upphaf fjármálahrunsins / Enn mikil hreyfing á fólki í Fjarðabyggð / Fljótsdalshérað bregst við kreppunni / Helgi Arngrímsson, minning / Skógarpúkar gefa austfirskum börnum jólatré /Umdeild ákvörðun yfirstjórnar RÚV um að hætta útsendingum svæðisútvarps.
Níunda október árið 1917 var bókað í gjörðabók dýrtíðarnefndar í Reykjavík að vegna verðþaks, sem sett hafði verið á kartöflur þar um slóðir, hyggðust kaupmenn senda kartöflubirgðir sínar með skipinu Sterling til Austfjarða og selja þær þar. Fyrir austan væri nefnilega ekkert hámarksverð á kartöflum.
Samvinnufélag útgerðarmanna í Neskaupstað, SÚN, veitti á þriðjudagskvöld þrettán milljónum króna til ýmissa samfélagsverkefna á Norðfirði. Er þetta í fyrsta sinn sem veitt er fé úr nýjum styrktar- og menningarsjóði félagsins. Tuttugu og sex einstaklingar og samtök hlutu styrki.
Þegar Austurglugginn var á ferðinni á Eskifirði í kvöld var kyrrlátt yfir smábátahöfninni. Þrír fiskimenn sprokuðu saman á bryggjunni eftir að hafa hugað að bátum sínum. Einhverjir ætluðu til veiða í nótt sögðu þeir, en annars væri tíðindalítið af sjósókninni.