Fótbolti: Hrepparígnum eytt með samæfingum
Þótt síðustu deildarleikir meistaraflokka Hattar og Fjarðabyggðar í knattspyrnu hafi endað með rauðum spjöldum og blóðugum andlitum er annað uppi á teningnum í yngri flokkum félaganna. Liðin stóðu í gær fyrir sameiginlegri æfingu í fimmta flokki drengja í Fjarðabyggðarhöllinni.Liðin hituðu saman upp undir handleiðslu Gunnlaugs Guðjónssonar, þjálfara Hattar. Að því loknu var skipt í tvö lið, Hött og Fjarðabyggð undir stjórn Alberts Jenssonar, og spilað.
Heldur færri voru í liðum Fjarðabyggðar sem þurftu því að fá lánsmenn frá Hetti. Það var auðsótt mál og skiptust Héraðsmenn á að spila í rauðu treyjunum til að jafnt væri í liðum.
Þetta er ekki í fyrsta skipti sem félögin standa fyrir æfingum sem þessum. Fimmti flokkur hefur áður hist og eins hafa verið sameiginlegar æfingar hjá sjötta flokki á árinu.
Myndir: Unnar Erlingsson
