Þrír Austfirðingar í Íslandsmeistaramóti sleðahunda
Þrír Austfirðingar taka þátt í Íslandsmeistaramóti Sleðahundaklúbbs Íslands sem haldið verður á Mývatni um helgina. Mótið hefur aldrei verið fjölmennara.Að austan fara þær Hjördís Hilmarsdóttir, Guðrún Frímannsdóttir og Halla Sóllilja Björnsdóttir en hver þeirra keppir í tveimur greinum.
Hjördís keppir í 5 km sleðadrætti með tvo hunda og 2 km skíðagöngu með einn hund. Guðrún keppir einnig í skíðagöngu með einn hund og 5 km skíðagöngu með tvo hunda.
Sóllilja keppir í unglingaflokki , annars vegar í 1 km sleðadrætti með einn hund og hins vegar 1 km skíðagöngu með einn hund.
Þetta er í fjórða sinn sem mótið er haldið en það hefur ávallt verið haldið við Mývatn. Skráningar í ár eru 66 og er þetta því stærsta sleðahundamót sem haldið hefur verið á Íslandi. Nánari upplýsingar um rástíma og mótið má finna á www.sledahundar.is
