Þróttur vann HK: Leikurinn varð óþarflega spennandi
Þróttur er kominn yfir í baráttunni við HK í undanúrslitum Íslandsmóts kvenna í blaki eftir 3-2 sigur í æsilegum leik í Neskaupstað í kvöld. Þjálfari Þróttar segist þakklátur fyrir breiddina í leikmannahópnum.Þróttur tók forustuna strax í byrjun og vann fyrstu tvær hrinurnar 25-18 og 25-23. „Leikurinn spilaðist vel framan af og við stjórnuðum þessum fyrstu tveimur hrinum alveg. Við höfum yfirburði í þeim þótt HK kæmust nálægt okkur í lokin," segir Matthías Haraldsson, þjálfari Þróttar.
Dæmið snérist alveg við í næstu tveimur hrinum sem HK vann 22-25 og 14-25. „Annars vegar fer HK að spila eins vel og þær geta og hins vegar gerist eitthvað í hausnum á okkur. Við verðum varkárar og eins og við óttumst að tapa."
Hausinn skrúfaðist aftur á Þróttarstelpur og þær höfðu undirtökin í oddahrinunni. „Þær jöfnuðu reyndar í 10-10 en við kláruðum þetta með góðum uppgjöfum."
Í samtali við Austurfrétt eftir leikinn í kvöld sagði Matthías að leikurinn hefði orðið „óþarflega spennandi eftir að við vorum 2-0 yfir. Það voru miklar sveiflur í leiknum en það gerir sigurinn þeim mun sætari."
Hann hrósaði sérstaklega Þórunni Egilsdóttur sem spilaði sinn fyrsta byrjunarliðsleik fyrir Þrótt í kvöld. Hún tók stöðu Maríu Karlsdóttur sem var með magapest.
„Þetta er ekki auðveldasti leikurinn til að vera í fyrsta skipti í byrjunarliði en Þórunn stóð sig frábærlega," sagði Matthías en María Rún kom inn á undir lokin.
Hann kveðst þakklátur áhorfendum fyrir stuðninginn en vonast eftir enn fleiri í salinn látum í úrslitarimmunni.
Liðin mætast aftur í Kópavogi á fimmtudagskvöld og er stefnan sett á að gera út um rimmuna þar. Gangi það ekki eftir mætast liðin í oddaleik í Neskaupstað eftir viku. „Við spilum yfirleitt vel í Fagralundi og ætlum okkur að klára rimmuna þar."
Jóna Guðlaug Vigfúsdóttir skoraði 20 stig fyrir Þrótt og Erla Rán Eiríksdóttir 12. Í liði HK skoraði Elísabet Einarsdóttir 20 stig og Karen Björg Gunnarsdóttir ellefu.
Annað kvöld tekur Þróttur á móti Stjörnunni í öðrum leik liðanna í undanúrslitum Íslandsmóts karla. Þróttur vann fyrri leikinn og getur tryggt sig í úrslitin með sigri á heimavelli. Leikurinn hefst klukkan 19:30.
