Íþróttir helgarinnar: Þrír leikir eystra í fótboltanum og meistaramót í sundi
Þrír leikir verða á austfirskum knattspyrnuvöllum um helgina en Höttur leikur á útivelli. Kvennalið Fjarðabyggðar tapaði fyrir Fram í vikunni. Þá fer meistaramót UÍA í sundi fram á Eskifirði.Austurlandsslagur helgarinnar verður á milli Leiknis og Einherja í Fjarðabyggðarhöllinni klukkan 14:00 á morgun. Liðin leika bæði í þriðju deild.
Á sama tíma hefst leikur Fjarðabyggðar og Dalvíkur/Reynis á Norðfjarðarvelli í annarri deild. Leikurinn átti upphaflega að fara fram nyrðra en liðin víxluðu heimaleikjum vegna vallaraðstæðna þar.
Í annarri deild tekur Huginn einnig á móti Aftureldingu á Fellavelli en sá leikur hefst ekki fyrr en 15:30. Þá heimsækir Höttur Hamar í Hveragerði á morgun í þriðju deild.
Fjarðabyggð tapaði 3-0 fyrir fram í 1. deild kvenna á miðvikudagskvöld en liðin mættust í Reykjavík. Fyrsta mark Framara kom á 43. mínútu en svo bættust við tvö mörk í seinni hálfleik.
Meistaramót UÍA í sundi verður haldið á morgun á Eskifirði. Mótið er ætlað 17 ára og yngri og búist er við keppendum frá öllum sunddeildum á starfssvæði UÍA.
Stigakeppni er milli félaga á mótinu og hampaði Austri stigabikarnum í fyrra og spennandi verður að sjá hvaða félag verður hlutskarpast að þessu sinni.
Öllum er velkomið að koma og horfa á keppnina og hvetja krakkana til dáða.
