240 þátttakendur í Urriðavatnssundi
Metþátttaka verður í Urriðavatnssundinu á laugardags en 240 sundmenn eru skráðir til í aðalsundinu leiks að þessu sinni. Elsti keppandinn að þessu sinni er 75 ára.„Við fórum af stað með 180 pláss, líkt og í fyrra. Þau fylltust á örfáum mínútum. Eftir það bættum við við 60 plássum sem fóru á hálftíma. Síðan eru tveir á biðlista ef það myndast eyður,“ segir Þórunn Hálfdánardóttir, einn skipuleggjenda sundsins.
Til viðbótar 2,5 km löngu aðalsundinu verður að þessu sinni boðið upp á 500 metra ungmenna- og skemmtisund sem tólf eru skráðir í. Því munu yfir 250 sundmenn synda í Urriðavatni á laugardag. Sundfólkinu í langa sundinu er skipt upp í fjóra riðla og verður sá fyrsti ræstur klukkan 7:15 á laugardagsmorgunn en sá síðasti klukkan 11:30. Skemmtisundinu verður stungið inn á milli klukkan 9:45.
Urriðavatnssundið er fulltrúi Austurlands í svokallaðri landvættaþraut, en til að ljúka henni þarf að leggja í skíðagöngu á Vestfjörðum, fjallahlaup á Norðurlandi og hjólreiðar á Reykjanesi auk sundsins innan árs. „Þetta er oft sá hluti sem reynist fólki erfiðastur,“ segir Þórunn.
Eins og fjölgunin ber með sér munu margir þreyta sundið í fyrsta sinn. Það á sér sína fastagesti. Eiríkur Stefán Einarsson, sem fyrstur þreytti sundið, syndir nú í tíunda skiptið en formleg keppni hófst 2013. Elsti keppandinn í ár er 75 ára gömul kona og sá yngsti í ungmennasundinu 2007.
„Það kemur alltaf ákveðinn kjarni. Ég er búinn að heyra í konu sem synti í erfiðum veðurskilyrðum hér 2017 og vonast til að prófa sundið nú við venjulegar aðstæður,“ segir Þórunn.
Vatnshitinn slái upp í 15 gráður
Miklar framkvæmdir hafa staðið yfir við innri enda Urriðavatns í sumar við aðstöðu Vök baths. Sundið í ár fer frá hefðbundnum stað, tanganum sem kenndur er við Hitaveitu Egilsstaða og Fella en eftir er að skoða svæðið úti fyrir baðstað Vakar betur upp á sund. Til stendur að nota tækifærið um helgina til að fara þar yfir á bátum með tæki sem skanna botninn.
Í vikunni hefur verið fylgst náið með hitastiginu í vatninu. Það var 13,5°C síðast þegar mælt var en miðað við veðurspá næstu daga má reikna með að hitinn verði kominn upp í 14,5-15°C á laugardagsmorgunn. Þórunn bætir við að vatnsborð vatnsins sé heldur lægra en oft áður sem gæti kallað á smávægilegar breytingar á sundleiðinni.
Byrjað er að setja út baujur til að merkja leiðina og verður framhaldið í dag og á morgun. Þeim tilmælum er beint til þeirra sundmanna sem vilja prófa vatnið að fara ekki út á það svæði sem verið er að setja út baujur á. Æfingasvæði er afmarkað við víkina þar sem sundið er ræst og út að fyrstu bauju.
