B-lið Hattar hampaði Bólholtsbikarnum
B-lið Hattar fór með sigur af hólmi í bikarkeppni UÍA og Bólholts í körfuknattleik en úrslitakeppnin fór fram á Egilsstöðum í gær.Höttur og Ásinn mættust í afar spennandi úrslitaleik sem Höttur vann 47-46. Liðsmenn Ássins fengu tvö skotfæri í síðustu sókninni en klikkuðu í bæði skiptin og Hattarmenn fögnuðu ákaft. Liðin tvö urðu efst og jöfn í deildakeppninni í vetur með tólf stig.
Lið Hattar er skipað yngri leikmönnum sem ýmist hafa verið á varamannabekknum hjá meistaraflokki eða eru enn í yngri flokkum. Samkvæmt reglum keppninnar máttu leikmenn ekki hafa spilað meira en 60 mínútur með meistaraflokki í vetur til að vera gjaldgengir.
Varamenn meistaraflokks dreifðust niður á fleiri lið í utandeildinni, þar með talið Ásinn. Eins voru þaðan leikmenn í Sérdeildinni sem varð í þriðja eftir 73-41 sigur á Austra.
Á milli leikja var keppt í þriggja stiga keppni sem Einar Bjarni Helgason, leikmaður Hattar, sigraði.
