Fjarðabyggð, Huginn og Leiknir með góða útisigra - Höttur laut í gervigras á Fellavelli
Boltinn fór loksins að rúlla í 1. og 2. deild karla í knattspyrnu um helgina. Skemmst er frá því að segja að Fjarðabyggð, Huginn og Leiknir sóttu virkilega sterka útisigra, en Hattarmenn töpuðu á heimavelli.Fjarðabyggð fór til Grindavíkur á laugardag, en Grindvíkingar eru með afar sterkt lið sem stefnir á að vera í toppbaráttu í 1. deildinni í sumar. Það blés byrlega fyrir Fjarðabyggð í upphafi leiks en Brynjar Jónasson skoraði eftir einungis fjórar mínútur og Viðar Þór Sigurðsson bætti við öðru marki þegar fimmtán mínútur voru liðnar. 0-2 fyrir nýliðunum.
Verkefnið varð þó heldur erfiðara eftir hálftíma leik, en þá var Milos Ivankovic rekinn af velli og ljóst að Fjarðabyggðarmenn þyrftu að leika einum færri í rúman klukkutíma. Grindvíkingar minnkuðu muninn í 1-2 skömmu seinna úr vítaspyrnu en nær komust þeir þó ekki. Fjarðabyggð fékk víti undir lok fyrri hálfleiks sem Brynjar Jónasson skoraði örugglega úr og fleiri urðu mörkin ekki í Grindavík. Virkilega sterk byrjun hjá liði Fjarðabyggðar.
Huginn byrjaði mótið sömuleiðis með góðum útisigri í Þorlákshöfn í gær. Þeir spiluðu ekki sinn besta leik og heimamenn í Ægi stjórnuðu gangi leiksins lengst af.
Huginsmenn komust þó yfir með vítaspyrnu frá Marko Nicolic um miðbik fyrri hálfleiks og höfðu 0-1 forystu í leikhléi. Á 59. mínútu jöfnuðu Ægismenn og virtust á þeim tímapunkti vera líklegir til að snúa leiknum sér í vil.
Tíu mínútum síðar fengu Huginsmenn síðan aðra vítaspyrnu og Marko fór aftur á punktinn og skoraði aftur af miklu öryggi framhjá landsliðsmarkverði Antigua og Barbúda, sem stendur á milli stanganna hjá Þorlákshafnarbúum.
Heimamenn í Ægi naga sig eflaust í handarbökin yfir þessum vítum, sem bæði skrifuðust á klaufalegan varnarleik. Ægismenn játuðu sig þó ekki sigraða og jöfnuðu með skoti fyrir utan teig sem sveif í fögrum boga yfir Jón Kolbein í markinu.
Flest virtist benda til þess að leiknum lyki með jafntefli, en Huginsmenn náðu að tryggja sér sigurinn á sjöttu mínútu uppbótartíma. Þá fengu þeir aukaspyrnu á miðjum vallarhelmingi Ægis og hinn 15 ára gamli Stefán Ómar Magnússon stangaði knöttinn í netið fyrir Seyðfirðinga. Leikurinn var svo flautaður af um leið og Ægismenn tóku miðju. Frábær úrslit fyrir Huginn.
Leiknismenn sóttu líka þrjú stig er þeir mættu Tindastóli í Boganum á Akureyri. Leiknum lauk með 1-2 sigri Leiknis. Fernando Garcia Castellanos kom Leikni yfir snemma leiks áður en jafnaði fyrir Tindastól á 30. mínútu. Markaskorari Tindastóls fékk síðan reisupassann á 69. mínútu og Leiknismenn náðu að knýja fram sigur undir lokin með marki frá Hilmari Frey Bjartþórssyni. Virkilega góð þrjú stig hjá Leiknismönnum.
Hattarmenn fengu Njarðvíkinga í heimsókn á Fellavöll í frosti og snjókomu á laugardag. Niðurstaðan varð 0-1 sigur gestanna, þeir skoruðu eftir tæplega hálftíma leik og leikmenn Hattar náðu ekki að svara. Hattarmenn hefðu eflaust viljað gera betur í sínum fyrsta leik á heimavelli og gaman verður að sjá hvað þeir gera í næstu umferð, en þá mæta þeir Huginn í nágrannaslag. Huginn á heimaleik en líklega fer leikurinn þó fram á Fellavelli.
