Knattspyrna: Alvaro Montejo Calleja snýr aftur til Seyðisfjarðar
Spænski sóknarmaðurinn Alvaro Montejo Calleja, sem lék með Huginn á síðustu leiktíð, hefur gengið aftur til liðs við félagið og fékk leikheimild í dag. Þessi félagaskipti ættu að styrkja Seyðfirðinga enn frekar í toppbaráttu 2. deildar karla í knattspyrnu.Alvaro Montejo er 25 ára gamall og er afar hæfileikaríkur leikmaður. Hann átti stóran þátt í velgengni nýliða Hugins í 2. deildinni í fyrra er hann skoraði 13 mörk í 19 leikjum í 2. deildinni í fyrra og var allt í öllu í sóknarleik liðsins. Það kom því engum á óvart að hann var valinn í lið ársins af þjálfurum og fyrirliðum í deildinni á vefsíðunni fótbolti.net.
Huginsmenn eiga leik gegn Ægi frá Þorlákshöfn á Seyðisfjarðarvelli á föstudag kl. 17:00 og eins og áður segir hefur Alvaro fengið leikheimild með Huginn og gæti mögulega tekið þátt. Huginsmenn eru í 3. sæti deildarinnar, einu stigi á eftir nágrönnum sínum í Leikni.
Uppfært: Alvaro Montejo er einungis í sumarfríi á Seyðisfirði og leikur bara með liðinu í næstu þremur leikjum. Að þeim loknum mun hann snúa aftur til Spánar og leika knattspyrnu þar. Hann fær þó tækifæri til að spila alvöru grannaslag, gegn Hetti á Vilhjálmsvelli síðar í mánuðinum.
Mynd: Alvaro í leik með Huginn síðasta sumar
