„Skemmtilegra að sparka í bolta en vera í lauginni"
Þór Albertsson frá Djúpavogi varð þrefaldur unglingalandsmótsmeistari í sundi á Unglingalandsmóti UMFÍ sem haldið var á Akureyri um verslunarmannahelgina. Keppendur frá UÍA náðu góðum árangri á mótinu og voru víða í verðlaunasætum, en alls hrepptu þeir níu gullverðlaun, auk fjöldann allan af silfur- og bronsverðlaunum.
Þór, sem keppir í flokki 11-12 ára, gerði sér lítið fyrir og sigraði í þremur greinum, 100 metra bringusundi, 50 metra bringusundi og 100 metra fjórsundi.
Þór keppti ekki aðeins í sundi á mótinu, heldur einnig í fótbolta og körfubolta. Hann segir körfuboltaliðið aðeins hafa verið með til gamans. „Það gekk bara alveg hræðilega illa í körfunni," segir Þór og hlær, en hann æfir bæði fótbolta og sund nokkrum sinnum í viku, en ekki körfubolta.
Þór er ekki óvanur því að standa á verðlaunapalli í sundi og vann til bronsverðlauna á sama móti í fyrra. Hann býst við því að halda áfram að æfa báðar greinarnar en er þó alveg ákveðinn í því hvor þeirra er skemmtilegri.
„Það er fótboltinn. Það er skemmtilegra að sparka í bolta en að vera í lauginni. Flestir vinir mínir eru í íþróttum og margir í fleiri en einni grein," segir þessi ungi og upprennandi íþróttamaður sem við óskum góðs gengis í framtíðinni.
