Leiknir vann Síldarvinnslubikarinn
Leiknir Fáskrúðsfirði hampaði Síldarvinnslubikarnum í knattspyrnu eftir 4-5 sigur á Hetti í lokaleik mótsins. Austfirska knattspyrnusumarið byrjar af alvöru í dag.Leiknismenn höfðu þegar tryggt sér titilinn í mótinu, sem er undirbúningsmót austfirsku liðanna, þegar flautað var til leiks þeirra gegn Hetti í Fjarðabyggðarhöllinni.
Leiknir vann alla fjóra leiki sína í mótinu og hlaut tólf stig. Höttur og Fjarðabyggð, sem voru hin liðin tvö í keppninni, skildu jöfn í báðum leikjum sínum og hlutu því ekki nema tvö stig hvort lið.
Höttur mætir fyrst austfirsku liðanna til leiks í deildakeppninni í ár en liðið tekur á móti Ægi í annarri deild karla á Fellavelli klukkan tvö í dag.
Liðið tekur síðan á móti Einherja á þriðjudagskvöld í forkeppni bikarkeppninnar. Einherji sló þar út Leikni með 0-3 sigri um síðustu helgi. Fjarðabyggð og Sindri mætast sama kvöld í keppninni á Höfn. Í bikarkeppni kvenna tekur Fjarðabyggð á móti Sindra eftir viku.
Leiknir, Fjarðabyggð og Huginn mæta til leiks í þriðju deild karla um næstu helgi. Fjarðabyggð og Höttur mætast í innbyrðisviðureign í fyrstu umferð B riðils fyrstu deildar kvenna föstudagskvöldið 24. maí og Einherji, eina austfirska liðið í fjórðu deild karla, hefur keppni í C-riðli 25 maí. Liðið leikur þá tvo leiki á tveimur dögum, gegn Ísbirninum í Kórnum í Kópavogi klukkan tvö á laugardag og síðan gegn Létti á Hertz vellinum í Breiðholti klukkan eitt sunnudaginn 26. maí.
