Öxi þríþraut: Hafliði varði titilinn
Hafliði Sævarsson, bóndi í Fossárdal, varði titil sinn í flokki einstaklinga í þríþrautarkeppninni Öxi, sem fram fór í dag. Lið Sóknarinnar vann í liðakeppni.Það var Sóknin, sem þeir Hilmar Gunnlaugsson og Jón Jónsson skipuðu, sem kom fyrst í mark á Djúpavogi í dag á tímanum 3:35,48 klst. Í öðru sæti í liðakeppninni urðu Fossárdalsbræður, Jóhann Atli og Bjartmar Þorri Hafliðasynir, á tímanum 4:14,21.
Hafliði, sem einnig vann einstaklingskeppnina í fyrra, varð fremstur einstaklinga á tímanum 3:43,06. Segja má að Hafliði hafi komist í mark við illan leik því annað dekkið sprakk á reiðhjóli hans skömmu áður en hann kom út á Djúpavog. Hann hélt áfram þar til hjólið var komið á felguna en hann varð að teyma það síðustu metrana.
Svanhvít Antonsdóttir varð fremst í kvennaflokki á tímanum 5:30,33. Engin kona keppti í fyrra svo Svanhvít telst fyrsti sigurvegari í kvennaflokki keppninnar. Í öðru sæti kvennaflokks varð aldursforseti keppninnar, Kristjana Bergsdóttir 61 árs, 24 mínútum á eftir.
Keppnin hófst með 750 metra sjósundi suður yfir Berufjörð. Þegar í land var komið settust keppendur á bak reiðhjólum og hóluðu 13 km á möl upp hinn snarbratta fjallveg Öxi, sem keppnin er kennd við. Efst á Öxinni voru hjólin skilin eftir og hlaupnir 19 km niður í Fossárdal. Þaðan var hjóluð 18 km leið út á Djúpavog.
Glampandi sól var lungan úr deginum og jafnvel heldur hlýtt í veðri fyrir keppni sem þessa. Keppendur sögðust samt þakklátir fyrir sólina sem hefði gert útsýnið í Fossárdal enn fegurra en ella.
