Þróttur farinn utan til þátttöku í Norðurlandamóti í blaki: Markmiðið að þróa liðið
Íslandsmeistaralið Þróttar í blaki kvenna flaug í morgun til Danmerkur þar sem liðið tekur þátt í Norðurlandamóti um helgina. Þjálfari liðsins býst við erfiðri helgi með miklu leikjaálagi og sterkum mótherjum.„Markmiðið með þátttöku í mótinu er að þróa okkar lið og leikmenn enn frekar með nýjum áskorunum. Þátttakan í þessu móti kemur til með að nýtast okkur vel í Íslandsmótinu og bikarkeppninni hérna heima þegar líður á veturinn,“ segir Matthías Haraldsson, þjálfari Þróttar.
Mótið er fram í Holte sem er nyrsta úthverfi Kaupmannahafnar. Heimamenn eru ríkjandi Danmerkurmeistarar og þykja líklegir sigurvegarar í mótinu.
Að auki leikur Þróttur gegn Svedala frá Svíþjóð sem hefur þrjá erlenda leikmenn í sínum röðum og Fredriksberg sem varð í fjórða sæti í dönsku deildinni í fyrra og er með sterka danska leikmenn í sínum röðum að sögn Matthíasar.
Hvert land má senda fjögur lið til keppni. Frá Íslandi hefur aðeins HK áður sent til á NEVZA. Níu leikmann fara frá Þrótti.
Matthías segir mikinn hug í leikmönnum þótt hann hefði kosið meiri undirbúning því álagið verður mikið um helgina.
„Mótið leggst vel í mig en undirbúningurinn gæti auðvita alltaf verið aðeins betri. Liðið er til dæmis bara búið að spila 2 leiki í deildinni á meðan KK lið Þróttar N er búið að spila 6 leiki. Þarna spilum við 3 leiki á 3 dögum sem verður erfitt og talsvert álag á leikmenn.
Það er riðlakeppnin sem leikin er um helgina en riðlarnir eru alls fjórir. Tvö efstu liðin komast áfram í úrslitakeppnina sem fram fer um mánaðarmótinu janúar/febrúar árið 2014.
Þróttur hefur keppni í kvöld klukkan 19:30 gegn Svedala, mætir Holte á morgun klukkan 14:00 og Fredriksberg á sunnudag klukkan 12:30. Allir leikir mótsins verða í beinni útsendingu á http://www.holtevolley.dk/.
Fleiri leikmenn Þróttar verða á faraldsfæti um helgina en þrjár stelpur og einn strákur spila með U-17 ára landsliðunum í móti á Englandi.
