Blak: Bæði liðin töpuðu fyrstu leikjunum
Bæði karla – og kvennalið Þróttar töpuðu fyrstu leikjum sínum í undanúrslitum Íslandsmótsins í blaki um helgina. Karlaliðið þarf því á sigri að halda í kvöld.
Karlaliðið spilaði fyrsta leik sinn við HK í Fagralundi á laugardag og vann Kópavogsliðið eftir oddahrinu. HK vann fyrstu hrinu 25-17 en Þróttur svaraði 19-25.
Aftur vann HK hrinu 25-20 en Þróttur hafði sigur í fjórðu hrinu eftir upphækkun, 24-26. Jafnt var framan af oddahrinunni en HK breytti stöðunni úr 7-6 í 12-6 og vann hana 15-8.
Liðin mætast aftur í Neskaupstað klukkan 19:00. Þróttur þarf að vinna þann leik til að knýja fram oddaleik.
Kvennaliðið spilaði við Aftureldingu í gær og tapaðist sá leikur 3-0 eða 25-18, 25-17 og 25-12 í hrinum.
Liðið var laskað því Ana Vidal og María Rún Karlsdóttir, sem skorað hafa flest stig í vetur, meiddust á æfingu á laugardagskvöld. Ana er snúin á ökkla en María Rún meidd í baki og er óljóst hve miklum bata þær ná fyrir leik númer tvö á Norðfirði á morgun.
Mikið álag er á liðunum í úrslitakeppninni. Þau ferðuðust saman suður um helgina og höfðu æfingaaðstöðu í Fagralund. Liðin komu austur með síðasta flugi í gær og fengu leikmenn karlaliðsins rétt aðeins að skreppa til síns heima áður en þeir mættu á létta æfingu. Fyrir leikinn í kvöld er síðan farið yfir upptöku af andstæðingunum.
