Blak: Fylkir og Stjarnan í heimsókn

Fylkir og Stjarnan koma í heimsókn um helgina til Neskaupstaðar í fyrstu deild karla og kvenna í blaki. Höttur hafði betur gegn Augnabliki í gær í fyrstu deild karla í körfuknattleik.

Karlaleikurinn er á undan en þar er Stjarnan í heimsókn klukkan 12:30 á morgun. Þó nokkur tengsl eru á milli liðanna í formi bræðrapara. Geir Sigurpáll og Hlöðver Hlöðverssynir spila með Þrótti en Stjörnuna þjálfar Róbert Karl Hlöðversson.

Kvennaleikurinn hefst klukkan 14:00 eða þegar karlaleiknum lýkur. Þróttur berst þar fyrir að halda efsta sæti deildarinnar.

Karlaliðið tryggði sér um síðustu helgi sæti í undanúrslitum bikarkeppninnar í blaki en seinni forkeppnin fór fram í Neskaupstað. Þetta er í fyrsta sinn í sögu blakdeildar Þróttar sem bæði karla- og kvennaliðin spila í undanúrslitum keppninnar.

Körfuknattleikslið Hattar vann í gærkvöldi Augnablik 95-74 í fyrstu deild karla í körfuknattleik á Egilsstöðum. Höttur hafði undirtökin allan leikinn. Frisco Sandidge var stigahæstur í liði Hattar með 29 stig.