Blak: Fyrstu stig kvennaliðs Þróttar
Kvennalið Þróttar náði í sín fyrstu stig í vetur þegar liðið vann Þrótt Reykjavík um helgina og spilaði oddahrinu gegn Völsungi í gærkvöldi. Karlaliðið hefur líka náð í fjögur stig úr tveimur leikjum síðustu daga.Bæði karla- og kvennalið Þróttar léku gegn Völsungi í gærkvöldi. Karlaliðið vann öruggan sigur, 3-0.
Það var þó nokkuð lengi af stað í fyrstu hrinu, Völsungur var yfir 13-14 en Þróttur breytti stöðunni í 20-14 og vann hrinuna 25-21. Önnur hrina var á þekk, Þróttur var undir 12-14 en tók þá góða rispu, komst í 19-15 og vann 19-15. Þróttur var ekki í neinum vandræðum í þriðju hrinunni. Skoraði fyrstu fimm stigin og vann hana 25-15.
Næstum búnar að snúa oddahrinunni
Kvennaleikurinn var aftur mun jafnari og réðust úrslitin ekki fyrr en í oddahrinu. Þróttur spilaði vel í fyrstu hrinu og vann hana 25-16. Leikurinn jafnaðist í annarri hrinu. Völsungur fór betur af stað en um hana miðja átti Þróttur góðan kafla, breytti stöðunni úr 11-14 í 15-15. Þá kom vondur kafli, Völsungur skoraði fimm stig í röð, komst í 15-20 og vann hana 18-25.
Þriðja hrinan var afar jöfn, liðin skiptust átta sinnum á forustunni og upphækkun þurfti til að knýja fram úrslitin. Völsungur var yfir 20-23 en Þróttur skoraði þá fjögur stig í röð. Völsungur skoraði næstu tvö og hefði getað unnið þegar staðan var komin í 24-25 en Þróttur setti þá þrjú stig í röð og vann 27-25.
Völsungur hafði yfirburði í fjórðu hrinu og vann hana 15-25. Þróttur var kominn í erfiða stöðu í oddahrinunni, lenti snemma sex stigum undir, 3-9 og 5-11 en náði að jafna í 13-13. Húsavíkurliðið skoraði hins vegar síðustu tvö stigin.
Fyrsti sigurinn í vetur
Um helgina komu tvö lið af höfuðborgarsvæðinu austur á Norðfjörð. Kvennaliðið náði í sín fyrstu stig á leiktíðinni þegar það vann Þrótt Reykjavík 3-0. Austanliðið var mun öflugra í fyrstu hrinu, skoraði fyrstu fimm stigin, náði síðan 10 stiga forustu og vann hana 25-19.
Önnur hrinan var jafnari. Undir lokin var Reykjavíkurliðið komið í vænlega stöðu, yfir 18-23. Norðfjarðarliðið jafnaði í 24-24, aftur komst sunnanliðið í 24-25 en loks skoruðu heimastelpur síðustu þrjú stigin og unnu 27-25. Þróttur Neskaupstað var síðan með forustu frá byrjun í þriðju hrinu og vann hana 25-21.
Samkvæmt tölfræðigreiningu spiluðu heimakonur fínan sóknarleik en gerðu dálítið af mistökum úr leiknum. Heiðbrá Björgvinsdóttir og Lucia Carrasco voru atkvæðamestar þeirra. Kvennaliðið er í fimmta sæti með fjögur stig úr fimm leikjum.
Unnu fyrstu tvær hrinurnar
Karlaliðið fékk hins vegar Aftureldingu í heimsókn og fór ágætlega af stað. Þróttur var yfir 15-9 í fyrstu hrinu en Afturelding snéri við taflinu og komst í 19-20. Þróttur vann þó 25-22. Önnur hrina var spennandi, Afturelding var feti framar en Þróttur vann á undir lokin, snéri stöðunni úr 22-24 í 25-24 og vann 27-25.
Afturelding var aftur með tök á þriðju hrinu, Þróttur gerði áhlaup í lokin en komst ekki nær en í 22-25. Fjórða hrinan var Mosfellsbæjarliðsins, það skoraði fyrstu fimm stigin og vann 19-25. Afturelding var síðan sterkari í oddahrinunni, komst í 2-8 snemma og vann 7-15.
Raul Garcia Asencio var langstigahæstur Þróttar í leiknum. Liðið er með átta stig úr sex leikjum og í fimmta sæti.
Mynd: Blakdeild Þróttar/Sigga Þrúða
