Blak: Kvennaliðið þarf að keyra suður í oddaleikinn
Kvennalið Þróttar Neskaupstað keyrir í dag suður til Reykjavíkur fyrir þriðja og síðasta leik liðsins gegn HK í undanúrslitum Íslandsmótsins í blaki. Ekki var pláss fyrir hópinn með flugi.
„Við byrjuðum að skoða þetta í byrjun vikunnar og þá voru ekki nógu mörg sæti fyrir heilt lið. Nú er ekkert laust,“ segir Unnur Ása Atladóttir, framkvæmdastjóri blakdeildar Þróttar.
Öðrum leik liðanna lauk á tíunda tímanum í gærkvöldi og með sigri Þróttar í oddahrinu varð ljóst að þriðja leikinn þyrfti í rimmu liðanna. Þegar Austurfrétt kannaði laus flugsæti í morgun var eitt laust sæti suður, með kvöldvél á föstudegi sem fer í loftið eftir að leikurinn hefst.
Því verða leigðir tveir bílaleigubílar undir hópinn. Annan þeirra þurfti að sækja upp í Egilsstaði og lagði hópurinn af stað á þriðja tímanum. „Við förum í dag því við getum ekki keyrt með leikmenn á leikdegi.“
Mikið álag hefur verið á leikmönnum síðustu vikur en liðið spilaði fyrsta leikinn á mánudagskvöld og annan leikinn í gærkvöldi. Tíu dagar eru frá síðustu útileikjum í deildinni, um páskana var hluti hópsins í landsliðsverkefnum og þar áður var bikarúrslitahelgi.
Í morgun þurfti einnig að finna gistingu sem fannst í Munaðarnesi. Síðasti leggurinn verður farinn í fyrramálið.
Vinna þarf tvo leiki í undanúrslitum til að komast í úrslit. Takist Þrótti það verður Afturelding andstæðingurinn. Fyrsti leikurinn yrði í Mosfellsbæ á þriðjudagskvöld, annar leikurinn í Neskaupstað á fimmtudag (sumardaginn fyrsta) og þriðji leikurinn í Mosfellsbæ á laugardegi. Þar þarf að vinna þrjá leiki svo leikirnir geta orðið fimm ef þarf.
