Blak: Strákarnir töpuðu fyrsta leiknum
Karlalið Þróttar tapaði fyrsta leik sínum gegn HK í undanúrslitum Íslandsmótsins í blaki í Kópavogi í gær. Kvennaliðið hefur sína baráttu í kvöld.
Deildarmeistarar HK höfðu algjöra yfirburði í leiknum í gær og unnu 3-0 eða 25-12, 25-19 og 25-15 í hrinum.
HK byggði strax upp fimm stiga forskot í fyrstu hrinu. Þeim mun hélt Þróttur í jafnvægi fram í 12-7 þegar HK komst á mikið skrið og breytti stöðunni í 20-9.
Önnur hrina var mun jafnari og var til dæmis jafnt 15-15. Þá fylgdi slæmur kafli fyrir Þrótt og HK var með pálmann í höndunum eftir að staðan var orðin 22-17.
HK skoraði fyrstu fimm stigin í þriðju hrinu en Þróttur kom til baka og minnkaði muninn í 13-12. Ógæfan dundi þá yfir á ný, HK skoraði sex stig gegn einu og kláraði leikinn.
Kvennalið félaganna mætast einnig í undanúrslitum. Fyrsti leikur þeirra verður í Fagralundi klukkan 19:15 í kvöld. Karlaliðin mætast aftur í Neskaupstað á morgun.
