Blak: Þróttur í kjörstöðu fyrir sæti í úrslitakeppninni
Þróttur Neskaupstað er kominn í kjörstöðu í baráttunni um sæti í úrslitakeppninni í Íslandsmóti kvenna í blaki eftir góða byrjun á árinu. Um helgina var Þróttur Reykjavík lagður að velli í Neskaupstað.
Heimaliðið hafði góð tök á leiknum og vann fyrstu tvær hrinurnar 25-13. Gestirnir svöruðu fyrir sig í þeirri þriðju 23-25 en Norðfjarðarliðið vann fjórðu hrinuna 25-19.
Ana María Vidal var langstigahæst með 33 stig, þar af skoraði hún 13 stig beint úr uppgjöf. María Rún Karlsdóttir skoraði 16 stig.
Þróttur er með 22 stig í þriðja sætinu þegar fjórar umferðir eru eftir af mótinu. Stjarnan er í fjórða sætinu með 15 stig og KA í því fimmta með 11 stig. Þróttur hefur unnið bæði liðin í byrjun árs og byggt upp gott forskot.
Styttra er í Aftureldingu sem er í öðru sæti með 24 stig eftir 10 leiki líkt og Þróttur.
Mynd: Blakdeild Þróttar/Borja González
