Bogfimi: Haraldur Íslandsmeistari á ný
Haraldur Gústafsson, úr SkAust, fór heim með tvo titla af Íslandsmótinu í sveigboga innanhúss sem haldið var um síðustu helgi.Haraldur sigraði í karlaflokki sem og keppni óháð kyni. Í úrslitum í karlaflokki hafði hann betur gegn Izaar Arnari Þorsteinssyni frá Akureyri 6-0.
Í úrslitum óháð kyni keppi Haraldur við Marín Anítu Hilmarsdóttur. Viðureign þeirra var mjög jöfn og jafnt, 4-4, þegar ein lota var eftir. Lotuna vann Haraldur með tveimur stigum, 29-27 og úrslitin þar með 6-4.
Haraldur endurheimti þar með Íslandsmeistaratitil karla, sem hann hafði unnið 2021 en hann tapaði í úrslitum í fyrra. Þá vann Haraldur Íslandsmeistaratitilinn utandyra 2020 og 21.
Einnig varð hann fyrsti Íslandsmeistari í keppni óháð kyni en það er nýr flokkur sem komið hefur verið á laggirnar til að stuðla að jafnri keppni karla, kvenna eða fólks sem skilgreinir sig utan þessara tveggja kynja.
Haraldur keppti einnig um titilinn í blandaðri keppni félagsliða, þar sem liðin samanstendur af einum karl og einni konu, ásamt Guðnýju Grétu Eyþórsdóttur frá Skaust. Þau töpuðu úrslitunum 5-1. Þau slógu hins vegar Íslandsmetið í blandarði félagsliðakeppni 50 ára og eldri í undankeppni mótsins þegar þau fengu 1028, sjö stigum meira en fyrra met.
Haraldur keppti einnig í alþjóðlegri keppni í sveigboga karla á mótinu og varð þar annar á milli tveggja Breta. Samkvæmt núgilandi reglum geta aðeins einstaklingar sem hafa búið hérlendis í að minnsta kosti ár og eru skráðir í aðildarfélög Bogfimisambandsins orðið Íslandsmeistarar.
Haraldur í keppni helgarinnar. Mynd: Bogfimisamband Íslands
