Bongóblíðu spáð á Sumarhátíð UÍA um helgina
„Það er sko ekkert verið að grínast með spána, það verður bongóblíða,” segir Gréta Sóley Arngrímsdóttir, um Sumarhátíð UÍA, sem fram fer á Egilsstöðum um helgina.
Það er löng hefð fyrir því á Austurlandi að koma saman á Sumarhátíð UÍA. Mótið er einstök skemmtun sem dregur fólk úr öllum áttum saman í leik og almennt glens. Í ár verður engin breyting þar á en dagskráin er fjölbreytt og er eitthvað í boði fyrir alla.
„Skráningin er í fullum gangi og það raðast inn þátttakendur. Á sunnudaginn geta fimm ára og yngri keppt í boltakasti, langstökki og 60 metra spretthlaupi. Einnig verður keppt í „pútti” eldri borgara, þannig að segja má að hægt sé keppa nánast frá fæðingu til dauða.
Við erum sérstaklega spennt yfir nýjum dagskárlið, góðgerðarmóti UÍA sem fram fer á föstudag. Þar verður safnað fyrir geðheilbrigðissvið HSA, en keppt verður í frjálsum íþróttum, stígvélakasti, vítaspyrnu og prjónakeppni. Við viljum sérstaklega hvetja fólk til þess að mynda boðhlaupssveitir og skrá sig til leiks, en því fleiri þátttakendur, því meiri peningur í þetta verðuga verkefni,” segir Gréta Sóley, en auk þátttökugjald er 1500 krónur, en auk þess er tekið við frjálsum framlögum sem allt rennur óskipt til málefnisins.
Skránigu á mótið lýkur á föstudag, en nánari upplýsingar má finna hér.
