Feðgar spiluðu saman fyrir Þrótt
Feðgarnir Egill Kolka Hlöðversson og Hlöðver Hlöðversson spiluðu saman fyrir Þrótt Neskaupstað gegn Þrótti Vogum þegar liðin mættust í efstu deild karla í blaki um seinustu helgi.„Það er gríðarlega gaman að spila með þessum ungu peyjum og geggjað að vera inni á vellinum með syninum. Mér hlýnaði um gamlar hjartarætur,“ segir Hlöðver.
Þeir höfðu báðir verið í leikmannahópi Þróttar leikina á undan en ekki komið inn á völlinn báðir í einu. Það náðist loks um síðustu helgi þegar Þróttur vann 3-0 öruggan sigur á Þrótti Vogum.
Hlöðver lék sinn fyrsta meistaraflokksleik á táningsaldri fyrir HK. Blakið vék þó fljótt fyrir öðrum verkefnum í lífinu og var hann kominn vel fram yfir þrítugt þegar skórnir voru teknir fram á ný. Hlöðver hefur síðan spilað með meistaraflokki Þróttar þann áratug sem liðinn er síðan liðið hóf aftur keppni í landsdeild í karlaflokki, utan eins.
Hann segist þá hafa ætlað að hætta en verið viðloðandi þjálfun og til taks þegar á þurfti að halda. Skórnir eru ekki enn farnir upp á hilluna en Hlöðver segist vera til taks þegar á þurfi að halda. „Það eru forréttindi að fá að vera með þessum öflugu ungu leikmönnum og síðan hjálpar maður með að veita þeim mótstöðu á æfingum.“
Hlöðver er orðinn 48 og segist vera einn þriggja öldunga í liðinu. Tveir leikmenn í hópnum teljast á miðjum aldri blakleikmanna en restin er um eða undir tvítugu og segir Hlöðver að Þróttur hafi um tíma um helgina náð að spila á liði þar sem meðalaldurinn hafi verið undir 18 árum. Í þeim hópi var Egill sem er 16 ára.
En fleiri fjölskyldubönd voru í liðum Þróttar um helgina. Í sama leik spiluðu bræðurnir Andri Snær og Arnar Sigurjónssynir saman. Þá gegna systkinin Þórarinn Örn og Ester Rún Jónsbörn lykilhlutverki í meistaraflokksliðunum. „Þetta er dæmigert fyrir svona lítið samfélag,“ segir Hlöðver.
Bæði liðin eiga heimaleiki um næstu helgi. Kvennaliðið á tvo leiki gegn Álftanesi en karlaliðið mætir HK. Hlöðver reiknar ekki með að þeir feðgarnir fái annað tækifæri saman þá á vellinum. „HK er sterkt og við munum keyra á aðalliðinu. Það þarf allt að ganga upp til að við eigum möguleika gegn þeim. En við verðum klárir ef kallið kemur.“
Egill og Hlöðver í leiknum gegn Þrótti Vogum. Mynd: Blakdeild Þróttar/Sigga Þrúða
