Fótbolti: Höttur/Huginn hafði betur gegn Einherja - Myndband
Höttur/Huginn er með fullt hús stiga að loknum þremur umferðum í þriðju deild karla í knattspyrnu. Liðið vann nágrannaslag gegn Einherja á Fellavelli í gærkvöldi.Heiðar Aðalbjörnsson kom Einherja yfir með föstu skoti fyrir utan teig strax á fyrstu mínútu en Stefan Spasic jafnaði á 37. mínútu með skalla eftir hornspyrnu. Knut Erik Mykleburst tryggði síðan Hetti þegar hann potaði boltanum yfir línuna eftir atgang í teignum fimm mínútum fyrir leikslok.
„Það var léttir að skora sigurmarkið því Einherji veitti okkur mjög erfiðan leik,“ sagði Brynjar Árnason, þjálfari Hattar/Hugins í viðtali við miðla félagsins eftir leik.
„Ég hafði alltaf á tilfinningunni að við myndum jafna því mér fannst við hafa stjórn á leiknum strax eftir að þeir skoruðu og við fengum færi. Mér fannst ganga verr að skapa færi í seinni hálfleik. Þá gerðum við breytingar og það skilaði marki í lokin.“
Höttur/Huginn er efstur í deildinni með níu stig af níu mögulegum. Leita þarf aftur til ársins 2015 til að finna sambærilega byrjun hjá forvera liðsins, Huginn en liðið náði þessum árangri í annarri deildinni þá. Því sumri lauk með því að félagið fór upp um deild. Einherji er án stiga en bara búinn með tvo leiki.
Fjarðabyggð tekur á móti Magna í annarri deild karla í kvöld og Leiknir heimsækir Fjallabyggð á morgun. Þá fer Fjarðabyggð/Höttur/Leiknir á Álftanes í annarri deild kvenna en Einherji í Grafarvogi og leikur gegn Fjölni.
