Gengið á Grænafell á Degi íslenskrar náttúru
UÍA, sveitarfélögin Fjarðabyggð og Fljótsdalshérað og Náttúrustofa
Austurlands efna til fjölskyldugöngu á Grænfell á morgun í tilefni Dags
íslenskrar náttúru. Fjallið var valið sem framlag UÍA í gönguverkefni
Ungmennafélags Íslands, Fjölskyldan á fjallið, í ár. Gengið verður upp
beggja vegna fjallsins og hittast hóparnir á toppnum.
Reyðafjarðarfjarðarmegin verður farið frá Grænafellsvelli kl 17:00 og vísar Þóroddur Helgason veginn. Héraðsmegin geta gönguhrólfar valið um tvo kosti. Annars vegar að leggja af stað frá sæluhúsinu á Fagradal kl 16:15 eða slást í hópinn við bílastæðið við Fagradalsá kl 17:00. Guðrún Sóley Guðmundsdóttir sér til þess að sá hópur rati rétta leið á toppinn.
Hóparnir hittast á toppnum, gæða sér á nesti, bregða á leik með góðum gesti, jafnvel taka lagið og rita nöfn sín í gestabók sem trónir á toppi fellsins. Skarphéðinn Þórisson sérfræðingur á Náttúrustofu Austurlands mun fræða göngufólk um það sem fyrir augu ber.
Gangan er ætluð öllum og verður hraðinn miðaður við það, auðveldast er að ganga frá bílastæðinu við Fagradalsá en leiðin frá Grænafellsvelli er ögn brattari, en þó auðgeng. Áætlað er að gangan á toppinn taki um ein og hálfa klukkustund. Þátttakendur eru hvattir til að klæða sig skynsamlega og taka með sér nestisbita.
