Gerist ekki betra en verða meistari með systur sinni
Systurnar Helena Kristín og Heiða Elísabet Gunnarsdætur voru báðar í lykilhlutverkum í liði Þróttar sem varð Íslandsmeistari í blaki kvenna í gærkvöldi.„Það er ólýsanlegt að verða Íslandsmeistari með litlu systur. Hún var kjúklingur þegar við spiluðum síðast saman sem var í Þakkagjörðarhátíðarfríi 2014 en nú er hún einn af bestu leikmönnunum í meistaraflokki,“ segir Helena Kristín.
Hún var í liði Þróttar sem varð Íslandsmeistari 2011 en fór í kjölfarið út til Bandaríkjanna í nám á styrk út af blakinu. Helena snéri svo heim eftir áramótin. „Ég er í öðru hlutverki nú, ég kom inn í liðið sem ungi leikmaðurinn þegar aðrar voru á toppnum. Þetta er samt sama tilfinningin.“
Helena er fædd árið 1992 en Heiða Elísabet er átta árum yngri. Hún hefur tekið miklum framförum í vetur og var einn af bestu leikmönnum liðsins í úrslitakeppninni. „Það er eins og hún segir, þetta gerist ekki betra,“ segir Heiða.
Meistaratitillinn var tryggður með 3-0 sigri á Aftureldingu sem átti aldrei roð við Þrótti í lokaleiknum. „Þær voru með bakið upp við vegginn og það sást því þær gerðu mistök,“ segir Heiða.
„Við komum mjög öruggar til leiks, vorum ákveðnar í að klára þetta hér, vera ekki með neitt stress og njóta leiksins,“ bætir Helena við.
Hún vill lítið gefa út á þessari stundu hvort hún verði áfram með liðinu. „Nú skulum við fagna og sjá svo til.“
