Helgarnámskeið í borðtennis
Borðtennissamband Íslands, í samstarfi við félagsmiðstöðina Nýung á Héraði og UÍA, stendur fyrir borðtennisnámskeiði á Egilsstöðum um helgina.
„Áhuginn er töluverður hjá krökkunum og ég býst við ágætri mætingu á námskeiðið,“ segir Árni Pálsson, forstöðumaður félagsmiðstöðvarinnar.
Borðtennissambandið hafði samband að fyrra bragði með áhuga á að koma austur með námskeið austur en sambærileg námskeið hafa verið haldin víðar um land síðustu misseri.
„Við í félagsmiðstöðinni reynum að koma á móts við sem flesta með afþreyingu og okkur fannst þetta snilldar tækifæri til þess að lyfta upp borðtennisáhuga á svæðinu.“
Æfingahelgin er ætluð öllum aldurshópum, vönum sem og óvönum spilurum. Hún hefst seinni part föstudags og stendur fram yfir hádegi á sunnudag. Um hana sjá formaður Borðtennissambandsins og landsliðsþjálfari.
Sambandið hefur hug á að koma á Austurlandsdeild í deildarkeppni sinni sem er ætluð lengra komnum. Rætt verður um þann möguleika um helgina.
Dagskráin fer fram í Nýung á Egilsstöðum og er þátttakendum að kostnaðarlausu.
