Hetti loks spáð áframhaldandi veru í úrvalsdeild
Í fyrsta sinn síðan Höttur komst í úrvalsdeild karla í körfuknattleik er því spáð í árlegri spá fjölmiðla og félaganna að liðið muni halda sæti sínu í deildinni. Keppni í deildinni hefst í kvöld.Spárnar eru tvær og voru kynntar á kynningarfundi fyrir deildina. Annars vegar er um að ræða spá fjölmiðla, hins vegar spá félaganna þar sem þjálfarar, fyrirliðar og formenn kjósa.
Spárnar eru nokkuð samhljóma þar sem Höttur endar í báðum í tíunda sæti, næsta sæti fyrir ofan fall. Í spá fjölmiðla fær liðið 39 stig af 144 mögulegum. Breiðablik fær 20 og Hamar 12 en Njarðvík er næsta lið fyrir ofan með 65 stig.
Í spá félaganna fær Höttur 115 stig af 396 mögulegum, Hamar 92, Breiðablik 72 en áfram er Njarðvík í fjórða neðsta sæti með 167 stig.
Þegar rýnt er nánar í niðurbrot spánna sést að almennt er því spáð að Höttur, Hamar og Breiðablik berjist um að komast hjá falli. Minni munur er síðan á liðunum þar fyrir ofan. Lítil trú virðist á að þau falli en á móti spá fáir því að þessi þrjú lið eigi möguleika á sæti í úrslitakeppninni.
Höttur leikur nú sitt sjötta tímabil í úrvalsdeild. Liðið spilaði fyrst þar 2005-6, síðan 2015-16, svo 2017-18 og 2020-21. Alltaf féll liðið jafn harðan aftur. Á síðustu leiktíð, 2022-23, tókst liðinu loks að halda sér uppi.
Liðið leikur sinn fyrsta leik, gegn Grindavík á útivelli, fimmtudaginn 5. október. Fyrsti heimaleikurinn er eftir viku.
Spárnar eru báðar samhljóma um að Tindastóll verði Íslandsmeistari og Valur endi í öðru sætinu.
