Höttur tapaði báðum leikjunum gegn KFÍ
KFÍ kom til Egilsstaða og vann báða leikina gegn Hattarmönnum um síðustu
helgi helgina. Ísfirðingar höfðu yfirburði í fyrri leiknum en sá seinni
var jafnari.
Í fyrri leiknum, sem var á föstudeginum, náðu KFÍ menn forustunni snemma og héldu henni nokkuð örugglega. Þeir voru 42-31 yfir í hálfleik. Seinni hálfleikurinn var svo nokkuð svipaður og var sigur KFÍ manna aldrei í hættu og lokatölur urðu 95-71.
Hattarmenn byrjuðu seinni leikinn af krafti og voru yfir 27-21 eftir fyrsta leikhluta. Annar leikhluti var ekki alveg jafn góður en KFÍ náði með góðum endaspretti að laga stöðuna og var hálfleikstaðan 48-46 Hattarmönnum í vil.
Í seinni hálfleiknum voru KFÍ mun sterkari og náðu forustunni frekar snemma og létu hana ekki af hendi sér það sem af leið leiks. Eftir þriðja leikhluta var staðan 73-67. Hattarar sýndu góða baráttu í lokin og hefðu með smá heppni geta fengið eitthvað útúr þessum leik en Ísfirðingar reyndust og sterkir og urðu lokatölurnar 99-95 þeim í vil.
Ísfirðingar eru á toppnum eftir að hafa unnið alla 9 leiki sína á tímabilinu á meðan Höttur deilir þriðja sætinu með Breiðablik sem þeir heimsækja einmitt í síðustu umferðinni fyrir jól föstudaginn 16. desember.
Viðar Örn Hafsteinsson þjálfari Hattar var vonsvikinn með helgina og sagði að fyrsti leikurinn hefði tapast á of mörgum mistökum og slæmri nýtingu sem þeir náðu þó að laga í seinni leiknum og að þeir hefðu getað stolið sigrinum í lokin. Hann talaði einnig um að mikilvægt væri að vinna Breiðablik í næsta leik til þess að vera í góðri stöðu um jólin. Hann var mjög ánægður með stuðningsmenn Hattar í báðum leikjunum.
Mike Sloan var sem fyrr atkvæðamestur í liði Hattar í báðum leikjunum og var með 29 stig í fyrri leiknum og 43 í seinni leiknum.
