Íþróttir helgarinnar: Lið Þróttar unnu einn leik af fjórum gegn Aftureldingu
Blaklið Þróttar riðu ekki feitum hesti frá viðureignum sínum gegn Aftureldingu í Neskaupstað um helgina. Körfuknattleikslið Hattar vann baráttusigur á Hamri á útivelli.Karla- og kvennalið Þróttar léku samanlagt fjóra leiki við Aftureldingu um helgina og unnu einn þeirra. Það var karlaliðið sem vann fyrri leik sinn í oddahrinu.
Afturelding vann fyrstu hrinuna 23-25 en Þróttur jafnaði með að vinna aðra hrinu 25-19. Þriðju hrinuna vann Afturelding 16-25 en Þróttur náði í oddahrinu með að vinna þá fjórðu 25-23. Hana vann Þróttur 15-11.
Afturelding snéri taflinu við í seinni leiknum í gær og vann hann í oddahrinu. Þróttur vann fyrstu hrinuna örugglega 25-14 en Afturelding næstu tvær 22-25 og 16-25. Þróttur náði aftur í oddahrinu með að vinna fjórðu hrinuna 25-14.
Sú varð æsispennandi, Þróttur fékk tækifæri til að vinna bæði í stöðunni 15-14 og 16-15 en Afturelding bjargaði sér, náði forskotinu og vann 19-21.
Karlaliðið er neðst í deildinni og var sigurinn á laugardag sá fyrsti sem liðið nær í vetur. Um er að ræða ungan leikmannahóp sem talsverðar breytingar hafa orðið á milli ára.
Brokkgengt hjá kvennaliðinu
Kvennaliðið tapaði báðum leikjum sínum fyrir Aftureldingu, þeim fyrri á laugardag 1-3. Þróttur vann þar aðra hrinuna 25-22 en tapað hinum 19-25, 23-25 og 17-25.
Afturelding vann svo seinni leikinn í gær 0-3, 19-25, 21-25 og 23-25.
Gengi kvennaliðsins hefur verið nokkuð brokkgegnt það sem af er tímabili. Í lok október vann það KA tvisvar á útivelli, en KA liðið styrkti sig verulega í sumar með að fá Helenu Kristínu Gunnarsdóttur og Paulu Gomez frá Þrótti.
Enn eru þetta einu leikirnir sem KA hefur tapað í deildinni. Eftir þá rimmu hefur Þróttur tapað tveimur leikjum gegn Völsungi á útivelli og tveimur leikjum gegn Aftureldingu á heimavelli. Liðið er í fjórða sæti deildarinnar nú þegar deildin er farin í jólafrí og sér fram á baráttu fyrir að trygga sig inn í úrslitakeppnina. Vonir eru hins vegar bundnar við að liðið styrkist fyrir vorið með endurkomu Önu Vidal.
Sex stig á 15 sekúndum
Höttur komst upp í annað sætið í fyrstu deild karla í körfuknattleik á föstudag með hörkusigri á Hamri í Hveragerði, 98-99.
Höttur var með frumkvæðið í leiknum fram í miðjan fjórða leikhluta að heimamenn komust einni yfir. Þegar Þegar 16 sekúndur voru eftir af leiknum skoruðu heimamenn og komust í 97-93.
Eftir leikhlé Hattar setti Bandaríkjamaðurinn Charles Clark niður þriggja stiga skot og minnkaði muninn í 97-96. Hamarsmenn fóru í sókn og þeirra Bandaríkjamaður, Everage Richardson, fékk víti. Hið seinna fór niður þannig staðan varð orðin 98-99.
Hattarmenn lögðu af stað í sókn, Clark keyrði að körfunni, skoraði og fékk víti að auki sem hann setti niður og breytti sögunin í 98-99. Hamarsmenn áttu leikhlé inni sem þeir nýttu og hófu sókn sína þegar sex sekúndur voru eftir af leiktímanum en misstu boltann og Höttur fór heim með stigin.
Clark var heitur á föstudag, skoraði 41 stig og Andrée Michelsson 30. Þá var David Ramos drjúgur með 12 stig og 11 fráköst og Hreinn Gunnar Birgisson skoraði 11 stig.
Nokkuð hefur gengið á í kringum Hattarliðið en í vikunni fyrir leik var miðherjinn Pranas Skurdauskas rekinn fyrir óásættanlega hegðun utanvallar.
Síðasti leikur Hattar fyrir jólafrí verður á fimmtudag gegn toppliði Þór Akureyri sem aðeins hefur tapað einum leik í vetur, fyrri leiknum gegn Hetti. Höttur er í öðru sæti deildarinnar, jafn Fjölni með 14 stig, fjórum stigum frá Þór en á leik til góða á nýju ári.
