Knattspyrna: Alltaf skemmtilegast að spila á sínum heimavelli
Huginn spilaði sinn fyrsta alvöru heimaleik á tímabilinu á laugardag þegar liðið gerði 2-2 jafntefli við Aftureldingu í annarri deild karla í knattspyrnu. Völlurinn á Seyðisfirði hefur verið óleikhæfur það sem af er sumri.
„Ástandið á vellinum er fínt eins og er. Það er búið að vera þurrt í rúma viku,“ segir Brynjar Skúlason, þjálfari Hugins.
Stemmingin hefur löngum verið góð á Seyðisfjarðarvelli og ekki spillti fyrir að óvenju fjölmennt var á leiknum þar sem bærinn var fullur af fólki út af LungA-hátíðinni.
„Það mæta þrisvar til fjórum sinnum fleiri á leik þegar LungA er heldur en gera á leiki okkar á Fellavelli. Stemmingin um helgina var góð enda er alltaf skemmtilegast að spila á sínum heimavelli.“
Mörkin í leiknum voru öll skoruð á tíu mínútna kafla í seinni hálfleik. Gonzalo Leon og Milos Ivanovic komu Huginn tvisvar yfir en gestirnir jöfnuðu strax aftur. Liðin eru í þriðja og fjórða sæti deildarinnar en jafnteflið þýddi að Huginn fjarlægðist efstu liðin, Magna og Njarðvík, lítillega.
„Það er allt opið enn, mörg stig eftir í pottinum og lið sem eiga eftir að spila innbyrðis. Það er helvíti súrt að hafa ekki náð að nýta eitthvað af þessum færum sem við fengum í upphafi móts.
Við höfum verið á góðu skrið og ekki tapað síðan í annarri umferð. Afturelding er eina liðið sem við höfum tapað fyrir svo þetta voru tvö fín lið sem mættust um helgina.“
Þrír sigrar Fjarðabyggðar í röð
Í sömu deild vann Fjarðabyggð sinn þriðja leik í röð þegar liðið vann Tindastól 2-3. Enrique Rivas, sem spilaði sinn fyrsta leik fyrir liðið í síðustu viku, skoraði tvö dýrmæt mörk í seinni hálfleik. Áður hafði Loic Ondo jafnað eftir að heimamenn höfðu komist yfir.
Lið Fjarðabyggðar lék mann færri frá 28. mínútu, þegar staðan var enn 1-1, eftir að Georgi Karaneychev fékk beint rautt spjald. Leikmaður heimamanna fékk rautt spjald fyrir tvær áminningar skömmu fyrir leikslok.
Fjarðabyggð er enn í fallsæti en aðeins á markamun því liðið er með 14 stig líkt og KV sem tapaði fyrir Hetti 0-2 um helgina. Ignacio Martinez og Brynjar Árnason skoruðu mörk Hattar í seinni hálfleik.
Leiknir tapaði fyrir Keflavík 2-4 um helgina í fyrstu deild og er í botnsætinu. Valdimar Ingi Jónsson kom Leikni yfir strax á fjórðu mínútu með glæsilegu langskoti en Keflvíkingar jöfnuðu skömmu seinna. Þeir komust yfir snemma í seinni hálfleik en Hilmar Freyr Bjartþórsson jafnaði á 80. mínútu með marki beint úr aukaspyrnu. Eftir sem áður var tími eftir fyrir Keflavík til að bæta við tveimur mörkum.
Í þriðju deild gerði Einherji 1-1 jafntefli við Þrótt Vogum á Vopnafirði. Sigurður Donys Sigurðsson kom Einherja yfir með marki beint úr aukaspyrnu á 37. mínútu en gestirnir jöfnuðu þremur mínútum fyrir lok venjulegs leiktíma. Einherjamenn voru manni færri frá miðjum seinni hálfleik þegar Bjartur Aðalbjörnsson fékk sitt annað gula spjald.
