Knattspyrna: Höttur/Huginn fær Fylki í heimsókn
Höttur/Huginn fær úrvalsdeildarlið Fylkis í heimsókn í 32ja liða úrslitum bikarkeppni karla í knattspyrnu. Liðið tryggði sér sæti þar með sigri á Völsungi um helgina meðan KFA tapaði fyrir Þór Akureyri. FHL lauk keppni í Lengjubikar kvenna með sigri.Dregið var í næstu umferð nú í hádeginu. Höttur/Huginn leikur í annarri deild, tveimur deildum neðar en Fylkir. Leikið verður miðvikudag og fimmtudag í næstu viku – það er síðasta vetrardag og sumardaginn fyrsta.
Höttur/Huginn vann Spyrni í fyrstu umferð og tók um helgina á móti Völsungi í annarri umferð. Höttur vann 2-0. Rafael Cabella skoraði fyrra markið á 76. mínútu og Valdimar Brimir Hilmarsson það seinna á 81. mínútu úr víti.
KFA sat hjá í fyrstu umferð og fékk sterkan andstæðing, Þór Akureyri úr fyrstu deild, í Boganum í gær. Þór var 3-0 yfir í hálfleik og var búið að bæta við fjórða markinu þegar Tómas Atli Björgvinsson minnkaði muninn á 62. mínútu. Þórsarar bættu svo við einu marki enn og unnu 5-1.
FHL lauk keppni í Lenjubikar kvenna með tveimur leikjum á höfuðborgarsvæðinu. Sá fyrri var á föstudagskvöld, 2-2 jafntefli gegn Fram. Samantha Smith kom FHL yfir á fjórðu mínútu en Fram jafnaði á 8. mínútu. Emma Hawkins kom FHL aftur yfir á 42. mínútu en Fram jafnaði aftur um miðjan seinni hálfleik. Pálmi Þór Jónasson, aðstoðarþjálfari FHL, er þjálfari Fram ásamt Óskari Smára Haraldssyni. FHL vann síðan ÍR 0-1 í gær. Samantha skoraði sigurmarkið á 22. mínútu.
FHL fór ekki vel af stað í keppninni en efldist í kringum páskana þegar erlendir leikmenn komu til liðsins. Samantha hefur reynst öflug og skoraði í öllum þremur leikjum sínum. FHL hefur lokið leik með 8 stig úr sjö leikjum í sjötta sæti. Liðið gæti enn fallið um sæti því HK og Grótta, sem eru fyrir neðan, eiga leik eftir.
Mynd: Unnar Erlingsson
