Körfubolti: Allt í baklás í seinni hálfleik gegn Val
Ekkert gekk upp sóknarlega hjá Hetti þegar liðið tapaði 80-69 fyrir Val á Hlíðarenda í úrvalsdeild karla í körfuknattleik á föstudagskvöld. Höttur var hins vegar yfir í leikhléi eftir frábæran fyrri hálfleik.Höttur fór betur af stað, náði undirtökunum í fyrsta leikhluta þegar liðið breytti stöðunni úr 7-9 í 8-17. Það var yfir eftir leikhlutann 16-28. Liðið hélt áfram í öðrum leikhluta, var fljótt komið í tæplega 20 stiga forustu, 18-35.
Það varð Valsmönnum til happs að Joshua Jefferson var með lífsmarki. Hann skoraði 14 stig seinni hluta annars leikhluta. Það og sterkur varnarleikur hélt heimaliðinu inni í leiknum því þegar leið á hægðist á stigaskori Hattar. Í hálfleik var staðan 42-52.
Sú þróun hélt áfram í þriðja leikhluta. Reyndar spiluðu bæði lið fínan varnarleik, um miðbik leikhlutans liðu þrjár mínútur á þess að nokkuð væri skorað. Eftir þann kafla náði Valur að jafna í 59-59 þegar ein mínúta og 20 sekúndur voru eftir. Höttur átti samt eina körfu eftir og var yfir 59-61 að loknum fjórða leikhluta.
Valur komst yfir með fyrstu körfunni, 62-61 en Höttur náði forskoti aftur, 62-65 með tveimur körfum í röð. Áfram var lítið skorað og þegar tæpar fjórar mínútur voru eftir var staðan jöfn, 69-69. Höttur skoraði hins vegar ekki meira í leiknum meðan Valur setti niður 11 stig og vann.
David Guardia Ramos og Denotaye Buskey voru stigahæstir í liði Hattar með 16 stig hvor.
